ប្រធានាធិបតីប្រទេសអ៊ូសបេគិស្ថាន លោក ស្ហាវខាត មឺហ្ស៊ីយ៉ូយ៉ែវ (Shavkat Mirziyoyev) បាននិយាយកាលពីថ្ងៃចន្ទ (២៧ ឧសភា) ថា ប្រទេសរុស្ស៊ី នឹងសាងសង់រោងចក្រថាមពលនុយក្លេអ៊ែរតូចមួយនៅអ៊ូសបេគិស្ថាន ដែលជាគម្រោងដំបូងគេនៅអាស៊ីកណ្តាលសម័យក្រោយសូវៀត។

កិច្ចព្រមព្រៀងនុយក្លេអ៊ែរនេះ ប្រសិនបើត្រូវបានអនុវត្ត នឹងបង្ហាញពីសមត្ថភាពរបស់រុស្ស៊ី ក្នុងការនាំចេញមិនត្រឹមតែថាមពលប៉ុណ្ណោះទេ ប៉ុន្តែថែមទាំងផលិតផលបច្ចេកវិទ្យាខ្ពស់ទៅកាន់ទីផ្សារអាស៊ីថ្មីផងដែរ នៅពេលដែលលោកខាងលិច កំពុងបង្កើនសម្ពាធតាមរយៈការដាក់ទណ្ឌកម្ម។

លោកប្រធានាធិបតីរុស្ស៊ី វ្ល៉ាឌីមៀ ពូទីន (Vladimir Putin) បាននិយាយថា រុស្ស៊ី នឹងដាក់ប្រាក់ចំនួន ៤០០ លានដុល្លារ ទៅក្នុងមូលនិធិវិនិយោគរួមដែលមានតម្លៃ ៥០០ លានដុល្លារ ដើម្បីផ្តល់ហិរញ្ញប្បទានដល់គម្រោងនានានៅក្នុងប្រទេសអ៊ូសបេគិស្ថាន។

លោក មឺហ្ស៊ីយ៉ូយ៉ែវ ក៏បាននិយាយផងដែរថា រដ្ឋធានីតាស្កិន មានចំណាប់អារម្មណ៍ក្នុងការទិញប្រេង និងឧស្ម័នបន្ថែមទៀតពីរុស្ស៊ី ដែលជាការបញ្ច្រាសនៃការអនុវត្តជាច្រើនទសវត្សរ៍ ដោយក្នុងនោះទីក្រុងមូស្គូ បាននាំចូលឧស្ម័នអ៊ីដ្រូកាបូនឌីអុកស៊ីតពីអាស៊ីកណ្តាល។

យោងតាមឯកសារដែលចេញផ្សាយដោយវិមានក្រឹមឡាំង ក្រុមហ៊ុននុយក្លេអ៊ែររដ្ឋ រ៉ូសាថូម (Rosatom) នឹងសាងសង់ម៉ាស៊ីនរ៉េអាក់ទ័រនុយក្លេអ៊ែររហូតដល់ ៦ គ្រឿង មានកម្លាំង ៥៥ មេហ្គាវ៉ាត់នៅអ៊ូសបេគិស្ថាន ដែលមានខ្នាតតូចជាងគម្រោង ២,៤ ជីហ្គាវ៉ាត់ ដែលបានព្រមព្រៀងគ្នាក្នុងឆ្នាំ២០១៨ ប៉ុន្តែមិនទាន់សម្រេចបាន៕