ក្រសួងការពារជាតិ បានប្រកាសកាលពីថ្ងៃចន្ទថា ប្រទេសប៉ូឡូញ បានបង្ហាញព័ត៌មានលម្អិតនៃកម្មវិធី «ខែលការពារភាគខាងកើត»របស់ខ្លួនក្នុងគោលបំណងពង្រឹងព្រំដែនភាគខាងកើត ជាគំនិតផ្តួចផ្តើមការពារព្រំដែនធំបំផុតរបស់ប្រទេស ចាប់តាំងពីឆ្នាំ១៩៤៥ មក។

រដ្ឋមន្ត្រីក្រសួងការពារជាតិ លោក វ្លាឌីស្ល កូស៊ីនាក កាមីស(Wladyslaw Kosiniak-Kamysz) បានបញ្ជាក់ពីសារៈសំខាន់នៃប្រតិបត្តិការសន្តិសុខប្រទេសប៉ូឡូញ ក្នុងសន្និសីទសារព័ត៌មាន ដែលធ្វើឡើងរួមគ្នាជាមួយអនុរដ្ឋមន្ត្រីក្រសួងការពារជាតិ និងនាយសេនាធិកានៃកងកម្លាំងប្រដាប់អាវុធប៉ូឡូញ ថានេះគឺជាប្រតិបត្តិការជាយុទ្ធសាស្ត្រ សម្រាប់រដ្ឋាភិបាល និងសន្តិសុខរបស់ប្រទេសប៉ូឡូញ។

រដ្ឋមន្ត្រីក្រសួងការពារជាតិ បានគូសបញ្ជាក់អំពីកម្មវិធីនេះ ដែលរួមមាន ការពង្រឹងរបាំងការពារ និងប្រព័ន្ធតាមដានដែនអាកាសទំនើបនៅគ្រប់កម្រិត។ លោកបានគូសបញ្ជាក់ថា ភារកិច្ចរបស់កម្មវិធី រួមមាន ការរារាំងសកម្មភាពរបស់កងកម្លាំងអរិភាព ការសម្របសម្រួលសកម្មភាពរបស់កងទ័ពប៉ូឡូញ និងការការពារជនស៊ីវិល។

អនុរដ្ឋមន្ត្រីក្រសួងការពារជាតិប៉ូឡូញ បាននិយាយថា ព្រំដែនរបស់ប្រទេសប៉ូឡូញ លាតសន្ធឹងប្រមាណ ៧០០ គីឡូម៉ែត្រ ដោយមាន ៤០០ គីឡូម៉ែត្រ ជាប់ព្រំដែនជាមួយប្រទេសបេឡារុស។ យើងចង់ឱ្យកម្មវិធីនេះ ត្រូវបានអនុវត្តភ្លាមៗ ហើយបញ្ចប់នៅត្រឹមឆ្នាំ២០២៨ ដែលការចំណាយប៉ាន់ស្មានគឺប្រហែល ២,៥៥ ពាន់លានដុល្លារអាមេរិក។

នៅក្នុងសន្និសីទសារព័ត៌មាន ក្រុមមន្ត្រីបានបង្ហាញថា គម្រោង «ខែលការពារភាគខាងកើត» នឹងត្រូវបានផ្តល់មូលនិធិដោយថវិការដ្ឋរបស់ប្រទេសប៉ូឡូញ ប៉ុន្តែប្រទេសនេះ ក៏ស្វែងរកការស្នើសុំជំនួយបន្ថែមពីសហភាពអឺរ៉ុបផងដែរ។ លោករដ្ឋមន្ត្រីការពារជាតិ បានបញ្ជាក់លើតម្រូវការសម្រាប់ការបង្កើនការវិនិយោគរបស់សហភាពអឺរ៉ុប ក្នុងវិស័យសន្តិសុខ ដោយលោកនិយាយថា សហភាពអឺរ៉ុប ត្រូវតែវិនិយោគច្រើនបន្ថែមទៀត លើផ្នែកសន្តិសុខ។