អ្នកតំណាងផ្នែកធុរកិច្ចដ៏សំខាន់ម្នាក់ បាននិយាយថា ក្រុមមេដឹកនាំធុរកិច្ចនៃប្រទេសកូរ៉េខាងត្បូង និងអារ៉ាប់រួម (UAE) នៅថ្ងៃអង្គារនេះ បានពិភាក្សាអំពីវិធីដើម្បីបង្កើនកិច្ចសហប្រតិបត្តិការសេដ្ឋកិច្ច និងអភិវឌ្ឍភាពជាដៃគូអាជីវកម្មនៅក្នុងឧស្សាហកម្មថ្មីៗ ដូចជាថាមពលស្អាត និងបច្ចេកវិទ្យាព័ត៌មាន និងទំនាក់ទំនង (ICT)។

វេទិកាវិនិយោគធុរកិច្ចកូរ៉េ-អារ៉ាប់រួម ដែលបានធ្វើឡើងនៅទីក្រុងសេអ៊ូលអំឡុងដំណើរទស្សនកិច្ចផ្លូវរដ្ឋរបស់ប្រធានាធិបតីអារ៉ាប់រួម លោក Mohamed bin Zayed Al Nahyan បានដឹកនាំមន្ត្រីរដ្ឋាភិបាល និងមេដឹកនាំធុរកិច្ចប្រមាណ ២០០នាក់ រួមទាំងរដ្ឋមន្ត្រីពាណិជ្ជកម្មកូរ៉េខាងត្បូង លោក Cheong In-kyo និងរដ្ឋមន្ត្រីការបរទេសអារ៉ាប់រួមទទួលបន្ទុកពាណិជ្ជកម្មក្រៅប្រទេស លោក Thani bin Ahmed Al Zeyoudi នេះបើយោងតាមសភាពាណិជ្ជកម្ម និងឧស្សាហកម្មកូរ៉េ (KCCI)។

លោក Cheong បាននិយាយនៅក្នុងសុន្ទរកថាស្វាគមន៍របស់ខ្លួនថា៖«កិច្ចសហប្រតិបត្តិការរវាងប្រទេសរបស់យើង បានវិវឌ្ឍន៍ពីការអភិវឌ្ឍន៍រោងចក្រ និងតំបន់ប្រេង ទៅជាភាពជាដៃគូយុទ្ធសាស្ត្រពិសេសដែលត្រូវបានបង្កើតដោយរោងចក្រថាមពលនុយក្លេអ៊ែរBarakah»។ យើងនឹងផ្តល់ការគាំទ្រ ដើម្បីឲ្យគ្រាប់ពូជនៃកិច្ចសហប្រតិបត្តិការ អាចលូតលាស់បាន។

រោងចក្រថាមពលនុយក្លេអ៊ែរ Barakah នៅទីក្រុងអាប៊ុយដាប៊ី ( Abu Dhabi) ដែលជាគម្រោងនុយក្លេអ៊ែរ នៅក្រៅប្រទេសដំបូងរបស់កូរ៉េខាងត្បូង ជានិមិត្តរូបនៃការសហការរបស់ប្រទេសទាំងពីរ។

ចាប់តាំងពីបង្កើតទំនាក់ទំនងការទូតនៅឆ្នាំ ១៩៨០ កូរ៉េខាងត្បូង និងអារ៉ាប់រួម បានចាប់ដៃគូ ក្នុងវិស័យផ្សេងៗ ជាពិសេសផ្នែកថាមពល និងសំណង់។

ពាណិជ្ជកម្មទ្វេភាគីរវាងប្រទេសទាំងពីរ បានឈានដល់ ២០,៨ ពាន់លានដុល្លារ ក្នុងឆ្នាំ ២០២៣ ដែលជាការកើនឡើងគួរឲ្យកត់សម្គាល់ពី ១៩០លានដុល្លារ ក្នុងឆ្នាំ ១៩៨០ ដែលធ្វើឲ្យអារ៉ាប់រួម ក្លាយជាដៃគូពាណិជ្ជកម្មធំជាងគេទី១៤ របស់កូរ៉េខាងត្បូង។