រដ្ឋបាលរបស់លោកប្រធានាធិបតីអាមេរិក ចូ បៃដិន (Joe Biden) បាននិយាយកាលពីថ្ងៃអង្គារ (២៨ ឧសភា) ថា ខ្លួនកំពុងតាមដានយ៉ាងដិតដល់នូវការស៊ើបអង្កេតទៅលើការវាយប្រហារតាមអាកាសរបស់អ៊ីស្រាអែល ដែលខ្លួនបានហៅថាជាសោកនាដកម្ម ប៉ុន្តែថាការស្លាប់នាពេលថ្មីៗនេះនៅក្រុង រ៉ាហ្វា (Rafah) មិនមែនជាប្រតិបត្តិការមូលដ្ឋានដ៏ធំនៅទីនោះ ដែលឆ្លងកាត់បន្ទាត់ក្រហមណាមួយរបស់សហរដ្ឋអាមេរិកនោះទេ។

នៅពេលត្រូវសាកសួរថា តើព្រឹត្តិការណ៍កាលពីចុងសប្តាហ៍មានលក្ខណៈគ្រប់គ្រាន់ជាប្រភេទនៃ «ការស្លាប់ និងការបំផ្លិចបំផ្លាញ» ដែលមន្ត្រីអាមេរិក បានព្រមានថាអាចធ្វើឱ្យមានការដកហូតជំនួយយោធាបន្ថែមដល់អ៊ីស្រាអែល ដែរឬទេ អ្នកនាំពាក្យក្រុមប្រឹក្សាសន្តិសុខជាតិ លោក ចន ឃឺបប៊ី (John Kirby) បានប្រាប់អ្នកយកព័ត៌មានថា «អ៊ីស្រាអែល បានប្រាប់ថា នោះគឺជាកំហុសឆ្គងដ៏សោកនាដកម្មមួយប៉ុណ្ណោះ»។

នៅពេលត្រូវសាកសួរថា តើលោកកំពុងនិយាយថាប្រតិបត្តិការជើងគោកថ្មីៗនេះនៅក្រុង រ៉ាហ្វា នឹងមិនជំរុញឱ្យសហរដ្ឋអាមេរិក ដកហូតជំនួយយោធាបន្ថែមទៀតមែនឬទេ លោក ឃឺបប៊ី បានឆ្លើយថា «ខ្ញុំជឿថានោះហើយជាអ្វីដែលខ្ញុំបាននិយាយ»។ 

ការស្លាប់នាពេលថ្មីៗនេះនៅក្រុងរ៉ាហ្វា បានសាកល្បងការសន្យារបស់លោក បៃដិន ក្នុងការដកសព្វាវុធពីអ៊ីស្រាអែល ប្រសិនបើសម្ព័ន្ធមិត្តរបស់សហរដ្ឋអាមេរិក មួយនេះបានធ្វើការលុកលុយដ៏ធំលើក្រុងរ៉ាហ្វា ដែលធ្វើឱ្យជនភៀសខ្លួននៅទីនោះប្រឈមនឹងហានិភ័យ។

អ៊ីស្រាអែល បាននិយាយថា «រឿងដ៏អកុសល ខុសឆ្គង និងសោកនាដកម្ម បានកើតឡើង» នៅក្នុងការវាយប្រហារតាមអាកាសកាលពីថ្ងៃអាទិត្យ ដែលបានបង្កឱ្យមានអគ្គិភ័យនៅក្នុងជំរំតង់មួយក្នុងទីក្រុងរ៉ាហ្វា ដោយបានសម្លាប់ជនជាតិប៉ាឡេស្ទីន ៤៥ នាក់។ អ៊ីស្រាអែល បាននិយាយថា ខ្លួនបានកំណត់គោលដៅលើប្រតិបត្តិករជាន់ខ្ពស់របស់ក្រុមហាម៉ាស ពីររូប នៅក្នុងប្រតិបត្តិការកាលពីថ្ងៃអាទិត្យនោះ ហើយមិនមានគោលបំណងធ្វើឱ្យជនស៊ីវិលស្លាប់បាត់បង់ជីវិតនោះទេ៕