សង្គ្រាមអ៊ីស្រាអែល នៅតំបន់ហ្កាហ្សា ចាប់តាំងពីការវាយប្រហារថ្ងៃទី០៧ តុលា មក បានស្តារឡើងវិញនូវការជំរុញជាសាកលសម្រាប់ប៉ាឡេស្ទីន ឱ្យទទួលបានភាពជារដ្ឋ។ ប្រទេសន័រវេស អេស្ប៉ាញ និងអៀរឡង់ កាលពីថ្ងៃអង្គារ (២៨ ឧសភា) បានក្លាយជាបណ្ដាប្រទេសចុងក្រោយគេដែលទទួលស្គាល់រដ្ឋប៉ាឡេស្ទីន ដោយបំបែកទស្សនៈដ៏យូរអង្វែងនៃមហាអំណាចលោកខាងលិច ដែលថាប៉ាឡេស្ទីន អាចទទួលបានឋានៈរដ្ឋលុះត្រាតែជាផ្នែកនៃសន្តិភាពដែលបានចរចាជាមួយអ៊ីស្រាអែល។

ជំហានរបស់ប្រទេសទាំងបី ដែលបានធ្វើឱ្យអ៊ីស្រាអែលខឹងសម្បារ នាំឱ្យប្រទេសចំនួន ១៤៥ ក្នុងចំណោមរដ្ឋសមាជិក ១៩៣ របស់អង្គការសហប្រជាជាតិ ដែលបានទទួលស្គាល់ជារដ្ឋប៉ាឡេស្ទីន។ ប្រទេសទាំងនោះរួមមានបណ្ដាប្រទេសមជ្ឈិមបូព៌ា អាហ្រ្វិក និងអាស៊ីជាច្រើន ប៉ុន្តែសហរដ្ឋអាមេរិក កាណាដា ប្រទេសភាគច្រើននៃអឺរ៉ុបខាងលិច អូស្ត្រាលី ជប៉ុន និងកូរ៉េខាងត្បូង មិនទាន់ទទួលស្គាល់ទេ។

កាលពីខែមេសា សហរដ្ឋអាមេរិក បានប្រើវេតូរបស់ខ្លួននៅក្រុមប្រឹក្សាសន្តិសុខអង្គការសហប្រជាជាតិដើម្បីរារាំងសំណើប៉ាឡេស្ទីនដើម្បីក្លាយជារដ្ឋសមាជិកពេញសិទ្ធិរបស់អង្គការសហប្រជាជាតិ។ ការវាយលុកឥតឈប់ឈររបស់អ៊ីស្រាអែល នៅតំបន់ហ្កាហ្សា ដែលបណ្តាលឱ្យមនុស្សជាង ៣៦.០០០ នាក់ស្លាប់ ដើម្បីជាការសងសឹកចំពោះការសម្លាប់មនុស្សជិត ១.២០០ នាក់របស់ពួកហាម៉ាស នៅក្នុងទឹកដីអ៊ីស្រាអែល បានបង្កើនការគាំទ្រយ៉ាងខ្លាំងនៅអឺរ៉ុប សម្រាប់ភាពជារដ្ឋរបស់ប៉ាឡេស្ទីន។

បន្ទាប់ពីការព្រមានជាច្រើនខែ ប្រទេសន័រវេស អេស្ប៉ាញ និងអៀរឡង់ កាលពីថ្ងៃអង្គារ ទីបំផុតបានបោះជំហានជាប្រវត្តិសាស្រ្តមួយនេះ ខណៈដែលប្រទេសមួយចំនួនទៀតក៏បានសម្តែង «ការត្រៀមខ្លួន» ដើម្បីទទួលស្គាល់រដ្ឋប៉ាឡេស្ទីន នៅពេលដែល «កាលៈទេសៈស័ក្ដិសម»៕