សិស្សាសាលារាប់ម៉ឺននាក់ នៅភាគខាងត្បូងប្រទេសប្រេស៊ីល មិនបានទៅថ្នាក់រៀនរបស់ពួកគេអស់រយៈពេលមួយខែមកហើយ បន្ទាប់ពីគ្រោះមហន្តរាយទឹកជំនន់ បានបង្កការជន់លិចសាលារៀនមួយចំនួន ហើយបានប្រែក្លាយសាលាខ្លះទៀតទៅជាទីជម្រក ដែលបង្កើនការព្រួយបារម្ភអំពីសុខភាពផ្លូវចិត្តរបស់ពួកគេ។

ក្នុងចំណោមសាលារៀនរដ្ឋជាង ២.០០០ កន្លែងរបស់រដ្ឋ រីអូ ក្រានដេ ដូស៊ុល (Rio Grande do Sul) ជិតមួយភាគប្រាំនៅតែបិទទ្វារ ដែលប៉ះពាល់ដល់សិស្សប្រហែល ១៨៥.០០០ នាក់។ លោកស្រី រ៉ាឃែល ទីហ្ស៊ីរ៉ា (Raquel Teixeira) រដ្ឋលេខាធិការក្រសួងអប់រំក្នុងរដ្ឋដែលរងគ្រោះដោយទឹកជំនន់មួយនេះបាននិយាយថា «មានកុមារជាច្រើនដែលរងរបួសផ្លូវចិត្តធ្ងន់ធ្ងរ។ នៅពេលដែលភ្លៀងចាប់ផ្តើមធ្លាក់ ពួកគេក៏ភ័យស្លន់ស្លោ»។

យោងតាមក្រុមមន្ត្រីរដ្ឋបានឱ្យដឹងថា ភ្លៀងដែលបានចាប់ផ្តើមកាលពីចុងខែមេសា បានធ្វើឱ្យទន្លេ និងបឹងជាច្រើននៅក្នុងរដ្ឋ រីអូ ក្រានដេ ភាគខាងត្បូងប្រទេសប្រេស៊ីល កើនឡើងដល់កម្រិតខ្ពស់ ដែលបណ្តាលឱ្យមានទឹកជំនន់ ដោយបានសម្លាប់មនុស្សយ៉ាងហោចណាស់ ១៦៩ នាក់ និងធ្វើឱ្យមនុស្សជាង ៥៨០.០០០ នាក់ត្រូវផ្លាស់ទីលំនៅ។

នៅភាគខាងជើងនៃរដ្ឋធានី ព័រតូ អាលេហ្រ្កេ (Porto Alegre) របស់រដ្ឋ នៅជិតទន្លេ ហ្គូអៃបា (Guaiba) ដែលជាតំបន់ដីខ្ពស់ជាងកម្រិតទឹកជំនន់ សាលាបឋមសិក្សាជាច្រើននៅតែស្ថិតនៅក្រោមទឹក។ ទីលានបាល់ទាត់របស់សាលា ប្រែក្លាយជាអាងហែលទឹក ខណៈដែលថ្នាក់រៀន និងសៀវភៅត្រូវបានគ្របដណ្ដប់ដោយភក់៕