​បាល់ទាត់៖ ​Lionel Messi នឹងមិន​អាច​នៅ​បន្ត​ជាមួយ Barcelona បានឡើយដោយសារតែ​ច្បាប់​ហិរញ្ញវត្ថុ​តឹងរ៉ឹង​របស់ La Liga​។ ​​ថ្ងៃអាទិត្យ​ម្សិលមិញ​នេះ Barcelona បានរៀបចំ​សន្និសីទ​​សារព័ត៌មាន​ចុងក្រោយ​ដល់ Lionel Messi ខណៈ​កីឡាករ​អា​ហ្ស​ង់​ទីន​រូបនេះ​បាន​និយាយ​ទាំង​ទឹកភ្នែក​ ចំពោះ​ការចាកចេញ​នេះ​ដោយ​ចាត់ទុក Barcelona គឺជា​ផ្ទះ​របស់ខ្លួន​ទៅហើយ​។

Messi ក៏បាន​បន្តថា ​ទំនាក់ទំនង​រវាង​រូបគេ​ និង Barcelona គ្មាន​បញ្ហា​ឡើយ ភាគី​ទាំង​ពីរបាន​ព្រមព្រៀងគ្នា​រួចហើយ​ពី​ការ​ចាប់ដៃគ្នា​បន្តទៅ​មុខ​ទៀត តែ​គ្រប់យ៉ាង​ពិតជា​មិនអាច​ទៅរួច​។ ​​កីឡាករ​វ័យ ៣៤ឆ្នាំ​រូបនេះ​ក៏បាន​និយាយ​ផងដែរ​ ពី​គោលដៅ​បន្ទាប់​របស់ខ្លួន​បន្ទាប់​ពី​ការចាកចេញ​នេះ​គឺ Paris Saint Germain អាចជា​គោលដៅ​ដែល​អាចទៅរួច តែ​អ្វីៗ​មិនទាន់​ផ្លូវការ​ទេ​។ អំឡុងពេល​បំពេញបេសកកម្ម​ជួយ​ក្រុម​អា​ហ្ស​ង់​ទីន​លើក​ពាន Copa America នៅ​ទឹកដី​ប្រេស៊ីល​នោះ Lionel Messi ក៏បាន​យល់ព្រម​កិច្ចព្រមព្រៀង​បន្ត​កិច្ចសន្យា​ជាមួយ Barcelona ផងដែរ​កាលពី​ពីរ​សប្តាហ៍​មុន និង​យល់ព្រម​កាត់​ប្រាក់ខែ​ពាក់កណ្តាល​។ ​​កិច្ចសន្យា​ថ្មី​នេះ Messi យល់ព្រម​នៅ​ជាមួយ Barcelona ដល់​ឆ្នាំ២០២៦ តែ​តាម​គោល​ការណ៍​របស់ La Liga គឺ​តម្រូវឱ្យ Barcelona កាត់បន្ថយ​ប្រាក់​ចំណាយ​លើ​ប្រាក់ខែ​សរុប​ជាមុនសិន មុននឹង​អាច​ចុះហត្ថលេខា​ជាមួយ​កីឡាករ​រូប​ណាមួយ​បាន​បន្ថែមទៀត​។

​​Lionel Messi គឺជា​អ្នក​ស៊ុត​បញ្ចូល​ទី​ច្រើន​បំផុត​ក្នុង​ប្រវត្តិសាស្ត្រ Barcelona ដោយ​រកបាន​សរុប ៦៧២គ្រាប់ ឈ្នះ​ពាន La Liga ១០លើក, UEFA Champions League ៤លើក, Copa del Rey ៧លើក ក៏ដូចជា​ឈ្នះ​ពាន​ឯកត្តជន Ballon d’Or ៦លើក​ច្រើនជាងគេ​។​ ​​រក្សាទុក Messi នៅ Barcelona គឺជា​គោលដៅ​របស់​ប្រធាន​ក្លិប​ថ្មី​លោក Joan Laporta ដែល​ជាប់ឆ្នោត​។​ ​កន្លងមក Messi ក៏​ធ្លាប់មាន​ទំនាក់ទំនង​ផ្ទេរ​ទៅកាន់ Paris Saint Germain និង Manchester City ផងដែរ ស្របពេល​ការផ្លាស់​ទៅកាន់​ទឹកដី​អាមេរិក Major League Soccer ក៏​ជា​ជំរើស​ផង​ដែរ​៕

​អត្ថបទ​៖​នាង សុភា​វុ​ធ