សហព័ន្ធអន្តរជាតិនៃកាកបាទក្រហម និងសង្គមអឌ្ឍចន្ទក្រហម (IFRC) នៅថ្ងៃពុធ (ទី២៩ ខែឧសភា) នេះ បានអំពាវនាវឲ្យមានបទឈប់បាញ់ និងការចូលទៅកាន់តំបន់ហ្កាហ្សាស្ទ្រីប ជាកន្លែងដែលមនុស្សរាប់លាននាក់ប្រឈមនឹងភាពអត់ឃ្លានកាន់តែធ្ងន់ធ្ងរឡើងៗ។

ដែនដីដែលហែកហួរដោយសង្រ្គាមមួយនេះ កំពុងរងគ្រោះជាមួយនឹងមហន្តរាយមនុស្សធម៌ជិត ៧ខែ បន្ទាប់ពីអ៊ីស្រាអែលបានបើកការវាយលុកឥតប្រណី ដើម្បីឆ្លើយតបទៅនឹងការវាយប្រហារដែលដឹកនាំដោយក្រុមហាម៉ាស កាលពីថ្ងៃទី៧ ខែតុលា ពោលគឺជាការវាយប្រហារ ដែលបានសម្លាប់មនុស្ស ១.២០០នាក់ នៅប្រទេសអ៊ីស្រាអែល។

ក្នុងបទសម្ភាសន៍មួយ នៅរដ្ឋធានីម៉ានីល ប្រទេសហ្វីលីពីន ប្រធាន IFRC លោកស្រី Kate Forbes បានប្រាប់សារព័ត៌មាន Reuters ថា៖ «យើងត្រូវការយ៉ាងខ្លាំងនូវដំណោះស្រាយនយោបាយ ដែលនឹងឲ្យយើងមានបទឈប់បាញ់ ហើយអាចឲ្យជំនួយចូលទៅតំបន់នោះបាន»។

លោកស្រី Forbes ដែល កាលពីខែធ្នូ បានក្លាយជាស្ត្រីទី២ កាន់ការងារកំពូល នៅឯបណ្តាញមនុស្សធម៌ដ៏ធំបំផុតរបស់ពិភពលោកនេះ បានបន្ថែមថា៖ «យើងត្រៀមខ្លួនជាស្រេច ដើម្បីធ្វើឲ្យមានភាពខុសប្លែក។ យើងត្រូវតែមានលទ្ធភាពចូលទៅកាន់ទីនោះ ហើយដើម្បីអាចមានលទ្ធភាពចូលទៅទីនោះបាន ត្រូវតែមានបទឈប់បាញ់»។

ប្រធាន IFRC គឺជាមុខតំណែងស្ម័គ្រចិត្ត និងត្រួតពិនិត្យបណ្តាញដែលបង្រួបបង្រួមអង្គការចំនួន ១៩១ ដែលធ្វើការទាំងក្នុងអំឡុងពេល និងក្រោយគ្រោះមហន្តរាយ និងសង្រ្គាម ដូចជាសង្គមអឌ្ឍចន្ទក្រហមប៉ាឡេស្ទីនជាដើម ដែលមានក្រុមរថយន្តសង្គ្រោះ នៅតំបន់ហ្កាហ្សា។

លោកស្រី Forbes បានប្រាប់ថា លោកស្រីបានឃើញស្ថានភាព «ដ៏គួរឲ្យតក់ស្លុត» នៅទីក្រុង Rafah អំឡុងទស្សនកិច្ចមួយ កាលពីខែកុម្ភៈ ពោលគឺប៉ុន្មានខែមុនពេលអ៊ីស្រាអែលចាប់ផ្តើមការវាយលុកដោយយោធាលើតំបន់ហ្កាហ្សាភាគខាងត្បូង ជាទីកន្លែងដែលបាន និងកំពុងផ្តល់ជម្រកដល់ប្រជាជនប៉ាឡេស្ទីនជាង ១លាននាក់ ដែលបានភៀសខ្លួនពីការវាយលុកទៅលើផ្នែកផ្សេងទៀតនៃដែនដីនេះ៕