ភ្នំពេញ ÷ ព្រះរាជាណាចក្រកម្ពុជា បានធ្វើជាម្ចាស់ផ្ទះនៃការប្រកួតប្រជែងចម្រៀងជាពួកអន្តរជាតិលើកទី១ ចាប់ពីថ្ងៃទី២៩ ខែឧសភា រហូតដល់ថ្ងៃទី១ ខែមិថុនា ឆ្នាំ២០២៤ ព្រឹត្តិការណ៍នេះរៀបចំឡើងដោយ INTERKULTUR ដែលជាស្ថាប័ននាំមុខគេលើពិភពលោក ក្នុងព្រឹត្តិការណ៍ចម្រៀងជាពួកអន្តរជាតិ សហការជាមួយក្រុមហ៊ុន All Dreams Cambodia និងមានការគាំទ្រពីក្រសួងវប្បធម៌ និងវិចិត្រសិល្បៈ ក្រសួងបរិស្ថាន ក្រសួងទេសចរណ៍ ក្រសួងព័ត៌មាន និងរដ្ឋបាលរាជធានីភ្នំពេញ។

ការប្រកួតប្រជែងចម្រៀងជាពួកអន្តរជាតិលើកទី១ បង្កើតឡើងដោយ INTERKULTUR ជាស្ថាប័នដ៏ល្បីល្បាញទូទាំងពិភពលោកដែលមានការចក្ខុវិស័យរបស់ខ្លួនក្នុងការផ្លាស់ប្តូរវប្បធម៌ និងការយល់ដឹងគ្នាទៅវិញទៅមកតាមរយៈតន្ត្រី ហើយបានបង្រួបបង្រួមមនុស្សតាមរយៈភាសាតន្ត្រី និងបានបណ្តុះបណ្តាល ជ័យលាភីក្រុមចម្រៀងជាង ១១,០០០នាក់ និងអ្នកចម្រៀង ៤៦០,០០០នាក់ ។ ព្រឹត្តិការណ៍នេះបានបន្តសកម្មភាព ផ្តល់ជូននូវវេទិកាពិសេសសម្រាប់ការជួបជុំចម្រុះជាតិសាសន៍ និងភាពស្រស់ស្អាតនៃការច្រៀងចម្រៀងជាពួក។ ព្រឹត្តិការណ៍នេះប្រព្រឹត្តទៅរយៈពេល ០៤ថ្ងៃ ដោយមានការចូលរួមពីក្រុមចម្រៀងចំនួន ០៧ក្រុម និងអ្នកចូលរួមជាង ២០០នាក់មកពីប្រទេសឥណ្ឌូនេស៊ី ម៉ាឡេស៊ី ថៃ និងកម្ពុជា។

កម្មវិធីនេះបានចាប់ផ្ដើមសម្ភោធជាផ្លូវការនៅថ្ងៃទី២៩ ខែឧសភា ឆ្នាំ២០២៤ នៅសាលមហោស្រពចតុមុខ ក្រោមអធិបតីលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប:។

លោកជំទាវ កែវ សុខពិសី អភិបាលរងរាជធានីភ្នំពេញ បានមានមតិស្វាមគមន៍យ៉ាងកក់ក្តៅ ដល់អ្នកចូលរួមប្រមាណជាង៤០០នាក់។ ដូចគ្នានេះដែរ ឯកឧត្តម ជួប ប៉ារីស រដ្ឋលេខាធិការក្រសួងបរិស្ថាន បានមានមតិ និងបង្ហាញពីគោលបំណង នៃការប្រកួតប្រជែងចម្រៀងជាពួកអន្តរជាតិលើកទី១នៅរាជធានីភ្នំពេញ ដើម្បីបង្កើនការរួមចំណែកកាត់បន្ថយនូវផលប៉ះពាល់បរិស្ថាន និងការអភិវឌ្ឍប្រកបដោយចីរភាព។

នាឱកាសនោះលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងថា ការប្រឡងចម្រៀងជាពួកអន្តរជាតិលើកទី១ ឆ្នាំ២០២៤ និងការប្រគុំតន្ត្រីមិត្តភាពនៅរាជធានីភ្នំពេញ មានការប្រមូលផ្តុំ និងបង្ហាញក្រុមចម្រៀងជាពួក ចំនួនប្រាំពីរក្រុម មកពីប្រទេសកម្ពុជា ឥណ្ឌូនេស៊ី ម៉ាឡេស៊ី និងថៃ ដើម្បីប្រកួតប្រជែងដណ្តើមយកពានរង្វាន់ និងបង្ហាញ ចែករំលែក និងអបអរសាទរវប្បធម៌ នៃប្រទេសនីមួយៗរៀងៗខ្លួន បង្ហាញនូវសោភ័ណ ទេពកោសល្យ គុណភាព និងវិជ្ជាជីវៈនៃការច្រៀងជាពួក។ ស្របគ្នានោះដែរ ព្រឹត្តិការណ៍នេះ លើកកម្ពស់ការយល់ដឹង ភាពសុខដុមរមនា សន្តិភាព និងមនុស្សជាតិ។ លោកជំទាវ មានទំនុកចិត្តនិងជឿជាក់ថា កម្មវិធីនេះនឹងអនុញ្ញាតឱ្យយើងកសាង និងអភិវឌ្ឍ យុវជនជំនាន់ក្រោយ ព្រមទាំងការស្រឡាញ់នៃវប្បធម៌របស់ពួកគេ។ លើសពីនេះទៅទៀត ការប្រឡងចម្រៀងជាពួកអន្តរជាតិលើកទី១ ឆ្នាំ២០២៤ នេះ គាំទ្រគោលដៅអភិវឌ្ឍន៍និរន្តរភាព (SDG) ប្រកបដោយមោទកភាព ជាមួយនឹងការឧបត្ថម្ភគាំទ្រពី គោលដៅសហសវត្ស៖ ជំហានកាបូន (Millennium Destinations: The Carbon Footprint), គម្រោងគាំទ្របរិស្ថានកម្ពុជា នៃក្រសួងបរិស្ថាន, ការប្រមូលផ្លាស្ទិច និងឥណទានផ្លាស្ទិចវិញ្ញាបនបត្រនៃ ក្រុមហ៊ុន Tontoton, អង្គការទឹកស្អាត ១០០១ “ទឹកតាមសាលារៀន,” និងកម្មវិធី SIPAR “បណ្ណាល័យ ចល័ត”។

លោកជំទាវ រដ្ឋមន្រី្ត បានបញ្ជាក់ថា តន្ត្រី គឺជាភាសាសកលគ្មានព្រំដែន និងអនុញ្ញាតឱ្យវប្បធម៌មានការផ្លាស់ប្តូរគ្នា។ តន្ត្រី មានឥទ្ធិពលខ្លាំងក្លា ក្នុងការប្រមូលផ្តុំមនុស្សមកពីគ្រប់ទីកន្លែងនៃពិភពលោក។ ក្នុងឱកាសនេះ យើងអបអរសាទរពហុភាពតន្ត្រី និងវប្បធម៌ ហើយកម្ពុជាមានកិត្តិយសក្នុងការស្វាគមន៍វត្តមានភ្ញៀវកិត្តិយសទាំងអស់គ្នា ដើម្បីចែករំលែកចំណង់ចំណូលចិត្ត និងទេពកោសល្យរបស់លោក លោកស្រីជាមួយនឹងយើងទាំងអស់គ្នា។ ក៏សូមថ្លែងអំណរគុណយ៉ាងកក់ក្តៅចំពោះ INTERKULTUR និង All Dreams Cambodia ចំពោះការប្តេជ្ញាចិត្តក្នុងការលើកកម្ពស់ចម្រៀងជាពួក និងការជម្រុញការយល់ដឹងជាអន្តរជាតិ។ មនោសញ្ចេតនា និងការលះបង់របស់លោកអ្នក គឺជាការលើកទឹកចិត្តដល់ពួកយើងទាំងអស់គ្នា៕

អត្ថបទ រដ្ឋា