ឯកឧត្តម ស៊ូនី វង្សវិសិដ្ឋ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្រ្តី​ក្រសួង​សង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី៣០ខែឧសភានេះ បានអញ្ជើញជាអធិបតី និង​ជាហត្ថលេខី ក្នុងពិធីចុះហត្ថលេខាកិច្ចព្រមព្រៀងគម្រោង រវាងក្រសួងសង្គមកិច្ច អតីត​យុទ្ធជន និងយុវនីតិសម្បទា ជាមួយនឹងបណ្តាសមាគម និងអង្គការមិនមែនរដ្ឋាភិបាលចំនួន ១២ ដែល​អនុវត្តផ្តោតលើក្រុមគោលដៅជាកុមារ គ្រួសារ មនុស្សចាស់ ជនមានពិការភាព និង​ជនរង​គ្រោះ​។

ក្នុងចំណោមសមាគម និងអង្គការ​មិនមែន​រដ្ឋាភិបាលទាំងអស់​ដែលបានចុះហត្ថលេខា​នា​ពេល​នេះ ​មានអង្គការមិនមែនរដ្ឋាភិបាលបរទេសចំនួន៦, អង្គការមិនមែនរដ្ឋាភិបាលក្នុងស្រុកចំនួន៦ ដោយ​ភាគច្រើនអនុវត្តគម្រោងនៅរាជធានីភ្នំពេញ និងតាមបណ្ដាខេត្ត​មួយ​ចំនួន​ទៀត​នៅ​ក្នុង​ប្រទេស​កម្ពុជា ក្នុងទំហំគម្រោងថវិកាសរុបប្រមាណជាង ២៤លានដុល្លារ សម្រាប់រយៈពេល៣ឆ្នាំ (២០២៤-២០២៧)។ កិច្ចព្រមព្រៀងនេះនឹងផ្ដោតលើវិស័យ៣ធំៗរួមមាន៖ទី១.សុខុមាលភាពកុមារ ទី២. គាំពារជន​រង​គ្រោះ និងទី៣.ពិការភាព។

នៅក្នុង​ពិធីចុះហត្ថលេខាកិច្ចព្រមព្រៀង ឯកឧត្តម ស៊ូនី វង្សវិសិដ្ឋ បានថ្លែងអំណរ​គុ​ណ​ចំពោះ​បណ្តា​សមាគម និងអង្គការមិនមែនរដ្ឋាភិបាល ដែលកន្លងមក និងពេលនេះ នៅតែបន្តកិច្ច​ព្រម​ព្រៀង​​គម្រោងជាថ្មីទៀត និងសូមស្វាគមន៍ចំពោះសមាគម អង្គការថ្មី ដែលបានស្នើ​សុំ​ចុះកិច្ច​ព្រម​ព្រៀង​គម្រោង ក្នុងការបង្កើតភាពជាដៃគូជាមួយក្រសួងសង្គមកិច្ច អតីតយុទ្ធជន និងយុវនីតិ​សម្បទា សម្រាប់រយៈពេល៣ឆ្នាំខាងមុខនេះ។

ជាមួយគ្នានេះ បណ្តាសមាគម និងអង្គការមិនមែនរដ្ឋាភិបាល បានប្តេជ្ញាថា នឹងបំពេញ​ការងារ​ឱ្យ​កាន់​តែ​មានប្រសិទ្ធភាពបន្ថែមទៀត ដើម្បីជួយដល់ជនរងគ្រោះ និងងាយរងគ្រោះនៅកម្ពុជា។

កន្លងទៅ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា តែង​មាន​ប្រសាសន៍លើកឡើងជារឿយៗថា សមាគម អង្គការមិនមែនរដ្ឋាភិបាលបរទេស និងក្នុងស្រុក គឺជាដៃ​គូដ៏សំខាន់មិនអាចខ្វះបាន ក្នុងការចូលរួមចំណែកអភិវឌ្ឍប្រទេសជាតិ ជាពិសេស រាជ​រដ្ឋាភិបាលនីតិកាលទី៧ ដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី​នៃ​ព្រះរាជាណាចក្រ​កម្ពុជា ជាប្រមុខដឹកនាំ បានប្រកាសពង្រឹង និងពង្រីកភាពជា​ដៃគូ​ជាមួយ​នឹង​អង្គការ​សង្គមស៊ីវិលនិងអង្គការមិនមែនរដ្ឋាភិបាល នៅក្នុងក្របខ័ណ្ឌច្បាប់ស្ដីពីសមាគម អង្គការ​មិនមែន​រដ្ឋាភិបាល ដើម្បីលើកកម្ពស់នីតិរដ្ឋ ពង្រឹងលទ្ធិប្រជាធិបតេយ្យ និងការ​ចូលរួម​ចំណែក​អភិវឌ្ឍ​សង្គម​កិច្ចរបស់កម្ពុជា។

គួរបញ្ជាក់ដែរថា ភាពជាដៃគូក្នុងកិច្ចសហប្រតិបត្តិការរវាងក្រសួងសង្គមកិច្ច អតីតយុទ្ធជន និង​យុវនីតិសម្បទា និងសមាគម អង្គការមិនមែនរដ្ឋាភិបាល ត្រូវបានបន្តបង្កើតឡើង តាមរយៈ​ការចុះ​កិច្ចព្រមព្រៀងគម្រោងជាបន្តបន្ទាប់។ រហូតមកដល់ពេលនេះ គឺមានសមាគម អង្គការមិនមែន​រដ្ឋាភិបាល​ក្នុងស្រុក និងបរទេស បានចុះកិច្ចព្រមព្រៀងគម្រោងជាមួយក្រសួងក្រសួងសង្គមកិច្ច អតីតយុទ្ធជន និងយុវនីតិសម្បទា ដែលនៅមានសុពលភាពចំនួន ១៥៨ ដោយក្នុងនោះ​កំពុង​អនុវត្ត​គម្រោងកិច្ចការពារកុមារចំនួន ១០២ កិច្ចការគ្រួសារចំនួន ២០ គាំពារជនរងគ្រោះចំនួន ២០ ជនមានពិការភាពចំនួន ១៥ និងមនុស្សចាស់ចំនួន១៕ អត្ថបទ៖ទូច សោភ័ណ