រដ្ឋមន្ត្រីការបរទេសអាមេរិកលោក Antony Blinken បានសន្យាផ្តល់ជំនួយទឹកប្រាក់ ៥០លានដុល្លារ ដល់ប្រទេសម៉ុលដូវ៉ា និងការគាំទ្រយូរអង្វែងរបស់សហរដ្ឋអាមេរិក ដោយនិយាយថា ប្រទេសនេះបានបង្ហាញពី «ភាពធន់ជាពិសេស» នៅចំពោះមុខ «ការគំរាមកំហែង» និង «កិច្ចខិតខំប្រឹងប្រែងជ្រៀតជ្រែក» របស់រុស្ស៊ី។

ក្រោមការដឹកនាំរបស់លោកស្រីប្រធានាធិបតី Maia Sandu ប្រទេសម៉ុលដូវ៉ា បានថ្កោលទោសយ៉ាងឥតញញើត ចំពោះការលុកលុយរបស់រុស្ស៊ីលើប្រទេសអ៊ុយក្រែន ហើយកំណត់គោលដៅចូលរួមជាមួយសហភាពអឺរ៉ុប។

ដោយនិយាយនៅក្នុងរដ្ឋធានី Chisinau (ជីស៊ីណូ) របស់ប្រទេសម៉ុលដូវ៉ា កាលពីថ្ងៃពុធ (ទី២៩ ខែឧសភា) លោកស្រី Sandu បាននិយាយថា ដំណើរទស្សនកិច្ចរបស់លោក Blinken គឺជា «សញ្ញាដ៏រឹងមាំនៃការគាំទ្រ» ដល់ប្រទេសម៉ុលដូវ៉ា។

គួរបញ្ជាក់ថា អ្នកការទូតជាន់ខ្ពស់របស់សហរដ្ឋអាមេរិក បានធ្វើដំណើរទៅកាន់រដ្ឋធានីរបស់ម៉ុលដូវ៉ា ដោយជួបពិភាក្សាជាមួយលោកស្រី Sandu ដែលគាំទ្រលោកខាងលិច នៅថ្ងៃឈប់សំចតដំបូងនៃដំណើរទស្សនកិច្ចខ្លីមួយ នៅអឺរ៉ុប ក្នុងគោលបំណងពង្រឹងនូវការគាំទ្រដល់ទីក្រុងគីវ នៅទូទាំងសម្ព័ន្ធមិត្តអង្គការណាតូ និងប្រទេសជិតខាងផ្សេងទៀត៕