កូរ៉េខាងត្បូង នៅថ្ងៃព្រហស្បតិ៍ (ទី៣០ ខែឧសភា) នេះ បាននិយាយថា សាលាពេទ្យរបស់ខ្លួន នឹងទទួលយកនិស្សិតបន្ថែមជិត ១.៥០០នាក់ នៅឆ្នាំ២០២៥ ដោយជំរុញបន្តទៅមុខជាមួយនឹងផែនការបង្កើនចំនួនចូលរៀនឲ្យបានច្រើន ដែលការសម្រេចនេះ បានបណ្តាលឲ្យក្រុមគ្រូពេទ្យទូទាំងប្រទេសធ្វើកូដកម្ម។

រដ្ឋាភិបាលបាននិយាយថា ការបង្កើននេះ គឺចាំបាច់ដើម្បីដោះស្រាយកង្វះគ្រូពេទ្យ ដោយលើកហេតុផលថា ប្រសិនបើមិនមានវិធានការទេនោះ កូរ៉េខាងត្បូងត្រូវប្រឈមជាមួយនឹងចំនួនគ្រូពេទ្យ ១៥.០០០នាក់ តិចជាងចំនួនដែលត្រូវការ ដើម្បីជួយគាំទ្រដល់សេវាសំខាន់ៗ។

តែក្រុមដែលតំណាងឲ្យគ្រូពេទ្យ ជំទាស់ថា ការបង្កើនចំនួននេះ នឹងធ្វើឲ្យគុណភាពនៃការអប់រំធ្លាក់ចុះ ហើយថា ចំណាត់ការនេះនឹងមិនជំរុញឲ្យគ្រូពេទ្យទៅធ្វើការ នៅតំបន់ដាច់ស្រយាល ឬបំពេញមុខងារក្នុងវិស័យដែលមិនសូវពេញនិយមនោះឡើយ។ ពួកគេនិយាយថា ផ្ទុយទៅវិញ រដ្ឋាភិបាលគួរតែផ្តល់អាទិភាពដោយការផ្ដល់ប្រាក់ខែ និងលក្ខខណ្ឌការងារល្អប្រសើរជាងនេះ។

គួរបញ្ជាក់ថា និស្សិតពេទ្យក្នុងចំនួនដ៏ច្រើន ដែលតាមការប៉ាន់ស្មានមានចំនួនប្រហែល ១៣.០០០នាក់ បានធ្វើកូដកម្ម តាំងពីចុងខែកុម្ភៈមកម៉្លេះ ដោយបង្កឲ្យមានភាពលំបាកដល់ប្រព័ន្ធថែទាំសុខភាពដែលនាំឲ្យមន្ទីរពេទ្យជាច្រើនបដិសេធមិនទទួលអ្នកជំងឺមួយចំនួន និងកាត់បន្ថយការវះកាត់ ដែលមិនស្ថិតក្នុងស្ថានភាពសង្គ្រោះបន្ទាន់។

ក្រសួងអប់រំបានឲ្យដឹងថា សាលាពេទ្យនឹងទទួលយកសិស្សចំនួន ៤,៦១០នាក់ នៅឆ្នាំ២០២៥ ដែលជាចំនួននៅខ្វះបន្តិចបន្តួចពីគោលដៅរបស់ប្រធានាធិបតីលោក Yoon Suk-yeol ដែលចង់បានចំនួន ៥.០០០នាក់៕