បន្ទាយមានជ័យ ៖ គណៈកម្មាធិការជាតិជំរុញចលនាភូមិមួយផលិតផលមួយ និង​អង្គការ​អុកស្វាម ក្រោមកិច្ចសហការជាមួយរដ្ឋបាលខេត្តបន្ទាយមានជ័យ និងផ្សារទំនើបប៊ីកស៊ី បាន​រៀប​ចំ​វេទិកាផ្គូផ្គងរវាងអ្នកផលិតនិងអ្នកទិញ និងការតាំងបង្ហាញផលិតផលក្នុងស្រុក ក្រោមគម្រោង «ការទទួលបានទីផ្សារ សម្រាប់អ្នកផលិតក្នុងស្រុក និងសហគ្រាសធុនមីក្រូ តូច និងមធ្យម (ភូមិ១ផលិតផល១)» ចាប់ពីថ្ងៃទី៣១ ខែឧសភា ដល់ថ្ងៃទី០២ ខែមិថុនា ឆ្នាំ២០២៤ នៅផ្សារទំនើប ប៊ីកស៊ី (Big C) ក្រុងប៉ោយប៉ែត។ ជាមួយនឹងគោលដៅរួមគ្នាក្នុងការអភិវឌ្ឍសេដ្ឋកិច្ចក្នុងស្រុកប្រកបដោយបរិយាប័ន្ន និងនិរន្តរភាព គម្រោង​នេះ​មានបំណងបង្កើតឱកាសទីផ្សារសម្រាប់សហគ្រាសធុនមីក្រូតូច និងមធ្យម និងអ្នក​ផលិត​ក្នុង​ស្រុក ដើម្បីជួបអ្នកទិញសក្តានុពល និងចូលរួមក្នុងការពិភាក្សាប្រកបដោយផ្លែផ្កា លើ​លក្ខខណ្ឌផ្គត់ផ្គង់ និងតម្រូវការផ្សេងៗ។

ឯកឧត្តមបណ្ឌិត សួង ណយ អនុប្រធា​ន​គណៈកម្មាធិការ​ជាតិ​ជំរុញ​ចលនា​ភូមិ១ផលិតផល១ នៃ​ទីស្តីការ​គណៈរដ្ឋមន្ត្រី បានថ្លែងថា «គណៈកម្មាធិការជាតិ និងគណៈកម្មាធិការខេត្ត-រាជធានី​ជំរុ​ញ​ចលនា​ភូមិមួយផលិតផលមួយ មានសេចក្តី​រំភើប​រីករាយ​ក្នុង​ការ​​ដឹកនាំ​គំនិត​ផ្តួចផ្តើម​ឱ្យ​មាន​ជំនួប​រវាង​អ្នកផលិត និងអ្នកទិញ ដ៏មានសារៈសំខាន់នេះ ដែលមានបំណង​កាត់​បន្ថយ​គម្លាត​រវាង​អ្នក​ផលិត​ក្នុងស្រុក និងអ្នកទិញសក្តានុពល ប្រកបដោយប្រសិទ្ធភាព និងសុចរិតភាព។ តាមរយៈ​ការបង្កើតយន្តការតភ្ជាប់បណ្តាញប្រទាក់ក្រឡាគ្នាប្រកបដោយអត្ថន័យ ពីអ្នកផ្គត់ផ្គង់វត្ថុធាតុដើម អ្នក​កែច្នៃវេចខ្ចប់ អ្នកប្រមូលផ្ដុំផលិតផល (ពីកសិដ្ឋានរហូតដល់តុបាយ ពីសិប្បករ​រហូត​ដល់​អ្នក​ប្រើប្រាស់) ហើយពួកគាត់អាចសិក្សាស្វែងយល់ដកស្រង់បទពិសោធន៍ពីគ្នាទៅវិញទៅមក ណែនាំ​អ្នកផលិតទៅកាន់ទីផ្សារ ដោះស្រាយបញ្ហាជាមួយស្ថាប័នពាក់ព័ន្ធ ក្នុងការសុំចុះបញ្ជីរ ឬ​ច្បាប់គតិយុត្តផ្សេងៗ និងជំរុញឱកាសពាណិជ្ជកម្ម ដែល​បាន​រួម​ចំណែក​ដល់​ការ​អភិវឌ្ឍ​សេដ្ឋកិច្ច នៃ​ខេត្ត​បន្ទាយមានជ័យ និងប្រទេសកម្ពុជាទាំងមូល និងបង្កើន​កម្រិត​ជីវភាព​របស់​សហគមន៍​មូលដ្ឋាន​ផងដែរ»។

 នាឱកាសនោះ ឯកឧត្ដម អ៊ុំ រាត្រី អភិបាល នៃគណៈអភិបាលខេត្ត ក៏បានមានប្រសាសន៍ ជំរុញ​ចលនា​ភូមិ១ផលិតផល១ នឹងបន្តណែនាំដល់ម្ចាស់ផលិតផល ឬអាជីវករ ដែល​ទទួល​បាន​វិញ្ញាបន​បត្រ ព្រមទាំងផលិតផលដែលបានចូលជាសមាជិកភូមិ១ ផលិតផល១ សូមបន្ត​ខិត​ខំ​បំពេញ​ឱ្យ​បាន​តាមលក្ខណៈបច្ចេកទេស និងទទួលការណែនាំរបស់ថ្នាក់ជាតិ ដើម្បីរក្សា​បាន​នូវ​គុណភាព អនាម័យ និងបច្ចេកទេស ផ្សេងៗនៃផលិតផលរបស់ខ្លួន។ មួយវិញទៀត ឯកឧត្ដម ក៏​បាន​ណែនាំ​ដល់អ្នកផលិត ត្រូវមានភាពស្មោះត្រង់ ចំពោះអ្នកទិញ ដោយឱ្យប្រាកដ ថាផលិតផល​ដែល​យើង​បានយកមកលក់ជាផលិតផលក្នុងផលិតដោយខ្លួនឯង ដើម្បី​ចូល​រួម​លើក​កម្ពស់​ផលិតផល​របស់ខ្មែរដែលផលិតបាន ជាជាងយកផលិតផលមកពីក្រៅប្រទេសមកលក់ ថា​ជា​របស់​ក្នុងស្រុក ដែលជាហេតុធ្វើឱ្យប៉ះពាល់ដល់ផលិតផលដែលយើងផលិតបាន ដោយត្រូវ​ចូលរួម​លើក​កម្ពស់​ផលិតផលដែលជាស្នារដៃរបស់ខ្មែរយើង ដើម្បីឱ្យពិភពបានដឹង និង​ស្គាល់​ផលិតផល​របស់​ខ្មែរ​យើង។

សូមបញ្ជាក់ថា វេទិកា និងការតាំងបង្ហាញផលិតផលនេះ គឺជាការផ្ដល់ឱកាសឱ្យអ្នកផលិត និង​អ្នក​ទិញ មានឱកាសបានជួបពិភាក្សាគ្នា ដើម្បីធ្វើការទំនាក់ទំនង ពិភាក្សា​នូវ​ផលិតផល​ដែល​យើង​ផលិតបាន នៅក្នុងស្រុក ដើម្បីលក់ដូរក្នុងទីផ្សារនៅក្នុងប្រទេស ក៏ដូចជា​លក់​ទៅ​កាន់​ទីផ្សារ​នៅ​ក្រៅប្រទេស។ ដោយការរៀបចំវេទិកាឆ្នាំ២០២៤នេះនៅមានខេត្ត-ក្រុង ចំនួន២បានចូលរួម រួមមាន ភ្នំពេញ កំពង់ធំ សៀមរាប និងបន្ទាយមានជ័យ៕ អត្ថបទ រឿង ចន្ទ្រា