ភ្នំពេញ៖ ប្រមុខរាជរដ្ឋាភិបាលកម្ពុជា តេជោ ហ៊ុន សែន បានអំពាវនាវទៅកាន់អ្នកបានចាក់វ៉ាក់សាំង AstraZeneca ទាំងពីរដូសរួចរាល់ហើយ ឱ្យបញ្ឈប់ការស្នើសុំចាក់ដូសទី៣នៃវ៉ាក់សាំងប្រភេទនេះ ដោយថា ដូសទី៣នៃវ៉ាក់សាំងនេះ ត្រូវបានផ្ដល់អាទិភាពដល់ក្រុមមន្ត្រីសុខាភិបាលជួរមុខ និងក្រុមដែលត្រូវបានកំណត់អាទិភាពតែប៉ុណ្ណោះ។
ប្រមុខរាជរដ្ឋាភិបាលកម្ពុជា បានអំពាវនាវបែបនេះនៅក្នុងសារជាសំឡេងដែលសម្ដេចបានផ្ញើជូនតាមបណ្ដាញសង្គមតេឡេក្រាមនៅរសៀលថ្ងៃនេះ។
សម្ដេចតេជោ ហ៊ុន សែន មានប្រសាសន៍ថា៖ «ខ្ញុំសូមអំពាវនាវចំពោះឯកឧត្ដមលោកជំទាវ លោកឧកញ៉ា លោកស្រី អស់លោក សម្រាប់ការចាក់ដូសទី៣ គឺសុំឱ្យផ្អាកការដាក់សំណើរស្នើសុំ លុះត្រាតែមានការសិក្សាហ្មត់ចត់រវាងគម្លាតដូសទី១ ដូសទី២ និងដូសទី៣ ហើយយើងមានវ៉ាក់សាំង ទើបយើងអាចឈានទៅដល់ការចាក់ជូនទៅដល់អ្នកដែលបានចាក់ដូសទី១ ដូសទី២នៃវ៉ាក់សាំង AstraZeneca»។
សម្ដេចតេជោ ហ៊ុន សែន បានបញ្ជាក់ថា វ៉ាក់សាំងដូសទីបី ឬដូសជំរុញដោយចាក់វ៉ាក់សាំង AstraZeneca នេះ ត្រូវបានកំណត់ផ្ដល់ជូនដល់ក្រុមមន្ត្រីជួរមុខនៅតាមបណ្ដាខេត្តជាប់ព្រំដែនជាមួយប្រទេសថៃ កងកម្លាំងប្រដាប់អាវុធ និងក្រុមកីឡាករដែលនឹងត្រូវចូលរួមប្រកួតកីឡាស៊ីហ្គេម (SEA Game)តែប៉ុណ្ណោះ។
សម្ដេចតេជោ ហ៊ុន សែន មានប្រសាសន៍បន្តថា៖ «សម្រាប់អ្នកមិនទាន់បានចាក់ ហើយបែរជាមកស្នើសុំចាក់ AstraZeneca គឺយើងមិនផ្ដល់ជូននោះទេ ដោយសារយើងមានតម្រូវការចាក់ដូសទី៣សម្រាប់ឱ្យកម្លាំងជួរមុខរបស់យើងដែលកំពុងពង្រាយទៅចាក់ជូនចំពោះខេត្ត៧កាលពីថ្ងៃអាទិត្យកន្លងទៅ និងកំពុងបែងចែកទៅខេត្តដទៃទៀត បូកនឹងការបញ្ជូនទៅឱ្យកងទ័ពដែលចាក់ឱ្យទាំងកងទ័ព ចាក់ឱ្យទាំងកម្លាំងនគរបាលដែលនៅជាមួយ ចាក់ឱ្យទាំងអតីតយុទ្ធជន និងអ្នកកីឡាដែលត្រូវចូលប្រកួតស៊ីហ្គេមដែលមុននេះស៊ីណូហ្វាម ឬស៊ីណូវ៉ាក់ គឺក៏មានច្រើនមានរួចទៅហើយ»។
សម្ដេចតេជោ ហ៊ុន សែន មានប្រសាសន៍បន្ថែមថា៖ «ដូច្នេះ យើងមិនមានសមត្ថភាព មិនមានលទ្ធភាពនៅក្នុងពេលនេះ ដើម្បីរក AstraZeneca ជូនចំពោះឯកឧត្ដមលោកជំទាវ អស់លោកលោកស្រី លោកឧកញ៉ា តាមសំណើរស្នើសុំនោះទេ»។
សម្ដេចតេជោ ហ៊ុន សែន បញ្ជាក់ទៀតថា៖ «សង្ឃឹមថា ឯកឧត្ដម លោកជំទាវ លោកឧកញ៉ា អស់លោក លោកស្រី ដែលបានចាក់ AstraZeneca ពីរដូសរួចមកហើយ សូមរង់ចាំឱ្យមានការសិក្សា និងសូមរង់ចាំឱ្យអាស្ត្រាសេនេកា បានមកដល់លើកក្រោយ»។
ប្រមុខរាជរដ្ឋាភិបាលកម្ពុជាថែមទាំងបញ្ជាកផងដែរថា វ៉ាក់សាំង AstraZeneca ដែលអង់គ្លេសបានផ្ដល់មកកម្ពុជានាពេលថ្មីៗនេះ នឹងត្រូវផុតសុពលភាពនៅត្រឹមខែកញ្ញាខាងមុខនេះហើយ ព្រោះតែវ៉ាក់សាំង AstraZeneca អាចរក្សាទុកបានត្រឹមតែរយៈពេល ៦ខែប៉ុណ្ណោះ៕អត្ថបទ ៖ ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
