ភ្លៀងធ្លាក់ខ្លាំងបានបង្កឲ្យកើតមានទឹកជំនន់ធ្ងន់ធ្ងរនៅតំបន់ភាគខាងត្បូងប្រទេសអាល្លឺម៉ង់កាលពីថ្ងៃសៅរ៍ ហើយក្រុមឧតុនិយម ព្យាករណ៍ថា ព្យុះផ្គររន្ទះនឹងកើតមានក្នុងរយៈពេលប៉ុន្មានម៉ោងទៀតនេះ ។ 

 នៅក្នុងទីក្រុង Fischach ស្ថិតនៅភាគខាងលិចទីក្រុង Munich ទឹកទន្លេ Schmutter ឡើងប្រៀបច្រាំង ធ្វើឲ្យទឹកហូរកាត់ស្ពាន និងជន់លិចដោយអន្លើ ។ 

 ដោយឡែក ផ្លូវថ្នល់ និងទីវាល បានរងផលប៉ះពាល់ផងដែរ ដោយសារទឹកជំនន់ ស្របពេលដែលក្រុមភ្នាក់ងារពន្លត់អគ្គិភ័យ បានបិទផ្លូវ និងបញ្ជាចរចរណ៍ឲ្យចេញពីតំបន់រងផលប៉ះពាល់ធ្ងន់ធ្ងរបំផុត ។ 

 នៅទីក្រុង Gessertshausen ដែលស្ថិតនៅចម្ងាយប្រហែល ៨គ.មពីទីក្រុង Fischach បានរងការជន់លិចធ្ងន់ធ្ងរដូចគ្នា ។ 

 ក្រុមអ្នកជំនាញមកពីសេវាកម្មឧតុនិយមអាល្លឺម៉ង់ ព្យាករណ៍ថា ភ្លៀងនឹងធ្លាក់ខ្លាំងពេញមួយយប់ ជាពិសេសនៅរដ្ឋភាគខាងកើត Thuringia រដ្ឋភាគខាងជើង Bavaria និងរដ្ឋភាគខាងត្បូង Baden-Wuerttemberg មុនពេលស្ថានភាពអាកាសធាតុល្អប្រសើរឡើងវិញ ពេលដែលភ្លៀងបោកបក់ទៅទិសខាងកើត ឆ្ពោះទៅកាន់ប្រទេសបារាំង ៕