គណៈកម្មការរៀបចំការប្រកួត បានរៀបចំពិធីចាប់ឆ្នោតបែងចែកពូលប្រកួត នៃពានរង្វាន់ Soccer League លើកទី៧ ឆ្នាំ២០២៤ រួចហើយ ក្នុងចំណោមបេក្ខភាពក្រុមបាល់ទាត់បុរស-នារី ទាំង ៦១ក្រុម ដែលបានចុះឈ្មោះចូលរួម មុនពិធីបើកការប្រកួតផ្លូវការ នាថ្ងៃទី០៩ ខែមិថុនា ឆ្នាំ២០២៤ ចុងសប្ដាហ៍នេះ ។

ពិធីចាប់ឆ្នោតនេះ បានធ្វើឡើងក្រោមវត្តមានឯកឧត្តម ខៀវ ភារិទ្ធ សមាជិកអចិន្រ្តៃយ៍គណ:កម្មធិការកណ្ដាល ស.ស.យ.ក និងជាប្រធានគណៈកម្មការប្រតិបត្តិ កាលពីចុងសប្ដាហ៍កន្លងទៅ នៅអគារ The Kampus ហើយក៏មានការចូលរួមជាសក្ខីភាពពីឯកឧត្តម ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជាផងដែរ ។

ឯកឧត្តម ខៀវ ភារិទ្ធ មានប្រសាសន៍ថា Soccer League មិនត្រឹមជាវេទិកាផ្ដល់ឱកាសដល់កីឡាករគ្រប់រូប មកពីគ្រប់ស្ថាប័នរដ្ឋ និងឯកជនជុំវិញរាជធានី-ខេត្ត បានបញ្ចេញសមត្ថភាពលើទីលានប្រកបដោយតម្លាភាពនោះទេ ប៉ុន្តែព្រឹត្តិការណ៍នេះ គឺបានចូលរួមចំណែកជាមួយរាជរដ្ឋាភិបាលកម្ពុជាក្នុងការបំផុសចលនាសាមគ្គីភាព រឹតចំណងមិត្តភាពរបស់យុវជននៅទូទាំងប្រទេស ជាពិសេសដើម្បីបង្កើតធនធានមនុស្សក្នុងវិស័យកីឡាបាល់ទាត់នៅកម្ពុជា ឲ្យកាន់តែមានភាពរីកចម្រើន និងរឹងមាំ ដើម្បីជាថ្នាលឆ្ពោះទៅកាន់ថ្នាក់ជាតិ និងអន្តរជាតិ ក្រោមពាក្យស្លោកមួយគឺ «ស្មារតីសាមគ្គីភាព» ។

ទន្ទឹមជាមួយគ្នាដែរ ឆ្នាំនេះ គឺជាជោគជ័យថ្មីមួយទៀត ដែលក្រុមបាល់ទាត់នារី បានចូលរួមប្រកួតកាន់តែច្រើនជាងមុន ដែលជាបទពិសោធន៍ថ្មីមួយ ក្នុងការប្រកួត និងឆ្នាំក្រោយៗទៀត ឯកឧត្តមសង្ឃឹមថា នឹងមានកំណើនកាន់តែច្រើន ដើម្បីលើកស្ទួយ និងជំរុញការអភិវឌ្ឍបាល់ទាត់នារីកម្ពុជាកាន់តែរីកចម្រើន តាមរយៈការប្រកួតបាល់ទាត់នារី នៃពានរង្វាន់ Soccer League ដែលផ្ដួចផ្ដើមគំនិតរៀបចំដោយឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ។

គួរដឹងថា ក្នុងចំណោមបេក្ខភាពចុះឈ្មោះចូលរួមប្រកួតពានរង្វាន់ Soccer League ឆ្នាំនេះ គឺមានក្រុមបាល់ទាត់បុរស ៤៨ក្រុម និងនាទី ១៣ក្រុម ។ សម្រាប់ក្រុមបាល់ទាត់បុរស បែងចែកជា ១៦ពូល ក្នុងមួយពូលមាន ៣ក្រុម ដើម្បីប្រកួតចាញ់រកក្រុមខ្លាំងប្រចាំពូលនីមួយៗឡើងវគ្គបន្ដ ។ រីឯផ្នែកនារី បែងចែកជា ៤ពូល ដោយពូល A មាន ៤ក្រុម ខណៈ ៣ពូលទៀត មាន ៣ក្រុមដូចៗគ្នា ។

ចំពោះការប្រកួត នៃពានរង្វាន់មិនអាជីពនេះដែរ នឹងប្រើប្រាស់ទីលានសរុប ៦ ក្នុងនោះក្រុមបាល់ទាត់បុរស នឹងប្រកួតនៅទីលានវិទ្យាល័យបឹង ត្របែក, ទីលាន AUPP, កីឡដ្ឋាន Smart RSN, កីឡាដ្ឋាន AIA Stadium, KMH Park, ពហុកីដ្ឋានជាតិអូឡាំពិក និងក្រុមបាល់ទាត់នារី ត្រូវប្រកួតនៅទីលានវិទ្យាស្ថានជាតិអប់រំកាយ និងកីឡា៕ អត្ថបទ លី ឈុនឡា