មន្រ្តីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា គិតក្នុងរយៈពេល ៥ខែ នៃឆ្នាំ២០២៤នេះ ទីភ្នាក់ងារជាតិមុខរបរ និងការងារ (NEA) បានផ្គូរផ្គងបញ្ជូនអ្នកស្វែងរកការងារធ្វើទៅឲ្យនិយោជកបានចំនួនជាង ១៥,០០០នាក់ ហើយអ្នកដែលទទួលបានការងារធ្វើមានចំនួនជិត ៣ពាន់នាក់។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ប្រាប់ព័ត៌មាន ប៊ីធីវី ឲ្យដឹងថា បច្ចុប្បន្ននេះ ទីភ្នាក់ងារជាតិមុខរបរ និងការងារ បានធ្វើការផ្សព្វផ្សាយជារៀងរាល់ថ្ងៃអំពីឱកាសការងារ ជាពិសេសតាមរយៈមជ្ឈមណ្ឌលការងារចល័ត ហើយមជ្ឈមណ្ឌលនេះចេញផ្សព្វផ្សាយបានជាង ៦០០ ដង ទៅកាន់យុវជន និងសាធារណជន បានជាង ៦ម៉ឺននាក់។

ឯកឧត្តមបានបន្តថា ការផ្សព្វផ្សាយតាមរយៈមជ្ឈមណ្ឌលការងារចល័តនេះ គឺមានសារៈសំខាន់ណាស់ ដែលធ្វើឲ្យយុវជននៅតាមទីដាច់ស្រយាល ក៏ដូចជាមិនទាន់បានមានឱកាសទទួលបានសេវាកម្មឱកាសការងារដែលផ្សព្វផ្សាយនៅទីស្តីការក្រសួងការងារ ដែលអាចទទួលបានព័ត៌មាន ដូច្នេះហើយបានជាក្រសួងការងារបានធ្វើការជារៀងរាល់ថ្ងៃ និងការបញ្ជូនមជ្ឈមណ្ឌលការងារនេះនៅគ្រប់ទិសទី ទោះបីជាតំបន់ដាច់ស្រយាលក៏ដោយ ដើម្បីផ្សព្វផ្សាយអំពីតម្រូវការការងារនៅកម្ពុជាសព្វថ្ងៃនេះ ដែលមានចំនួនជាង ៥ម៉ឺននាក់ ដែលត្រូវការកម្លាំងពលកម្មយុវជនចូលបម្រើការងារ។

ទាក់ទិនការងារផ្សព្វផ្សាយព័ត៌មានការងារនេះ ក្រុមនិស្សិតនៅសាកលវិទ្យាល័យភូមិន្ទភ្នំពេញ បាននិយាយថា សព្វថ្ងៃនេះបានមើលឃើញថា អត្រាការងារពិតជាមានច្រើនណាស់ និងមិនមែន​តែមួយ​ផ្នែកនោះទេ ប៉ុន្តែអ្វីដែលសំខាន់ចំពោះមុខ​ គឺការត្រៀមខ្លួនដើម្បីឆ្លើយតបទីផ្សារការងារដែល​កំពុងមានតម្រូវការ។ ក្រុមនិស្សិតទាំងនេះ ក៏បានបានលើកឡើងស្រដៀងគ្នាទៀតថា ការផ្សព្វផ្សាយ​អំពីព័ត៌មានទីផ្សារការងារសព្វថ្ងៃនេះទៀតសោត ក៏មានភាពទូលំទូលាយច្រើនជាងមុនផងដែរ មិនថាតាមរយៈការផ្សព្វផ្សាយដោយផ្ទាល់ ​និងតាមប្រព័ន្ធអ៊ិនធើណេតជាដើម ដោយឃើញថា ពិតជាផ្តល់ឱកាសកាន់តែជាច្រើនក្នុងការស្វែងយល់ពីតម្រូវការការងារទាំងពេលបច្ចុប្បន្ន និងទៅអនាគត។

សូមបញ្ជាក់ជូនថា ក្នុងគោលបំណងឆ្លើយតបតម្រូវការការងារ ក៏ដូចជាផ្តល់នូវដំណោះស្រាយបញ្ហា​ទីផ្សារការងារ រាជរដ្ឋាភិបាលកម្ពុជា បានបង្កើតទីភ្នាក់ងារជាតិមុខរបរនិងការងារ (NEA) ដើម្បីផ្តល់​សេវាការងារ និងព័ត៌មានទីផ្សារការងារជាសាធារណៈនៅមួយកន្លែង និងងាយស្រួល​តាមរយៈប្រព័ន្ធ​ផ្សព្វផ្សាយ​នានា ដូចជា តាមរយៈគេហទំព័រ, ហ្វេសប៊ុក , តេឡេក្រាម និងនៅតាមមជ្ឈមណ្ឌល​ការងារនៅរាជធានី-ខេត្ត និងរថយន្តចល័ត៕អត្ថបទដោយ ឈិត បូរ៉ាវី