បាល់ទាត់៖ អតីតយុវជនសាលាបាល់ទាត់ជាតិបាទី ឡុង ម៉េងហាវ កំពុងសាងភាពលេចធ្លោលើកទីលានជាមួយក្លិបអង្គរថាយហ្គឺរ ដោយបានរួមចំណែកយ៉ាងច្រើនក្នុងការជួយក្រុមមានមូលដ្ឋាននៅខេត្តសៀមរាបនេះ។
ទន្ទឹមជាមួយភាពលេចធ្លោនេះ ម៉េងហាវ បានទម្លាយនូវមូលដ្ឋានដ៏សំខាន់មួយ ដែលជំរុញរូបគេឲ្យធ្វើបានល្អគឺពាក្យសម្ដីម្ដាយរបស់ខ្លួន ដែលតែងតែជំរុញ និងផ្ដល់កម្លាំងចិត្តដល់រូបគេរាល់ការប្រកួតទាំងអស់។ ខ្សែប្រយុទ្ធវ័យក្មេងរូបនេះបានទទួលស្គាល់ថា នេះគឺជារដូវកាលដំបូងដែលរូបគេធ្វើបានល្អ ក្រោយចាកចេញពីសាលាបាល់ទាត់ជាតិបាទី។ ប៉ុន្ដែយ៉ាងណាគេក៏មិនភ្លេចខ្លួន និងការខិតខំប្រឹងប្រែងបន្ថែមទៀតដែរ ដើម្បីសម្រេចគោលដៅចង់ជាប់ជម្រើសជាតិ និងបំពេញបំណងម្ដាយរបស់ខ្លួន។ សូមរំឭកថា ឡុង ម៉េងហាវ បានចូលហ្វឹកហាត់នៅសាលាបាល់ទាត់ជាតិបាទីពីឆ្នាំ២០១៣ ដល់ដំណាច់២០១៨ មុនចូលរួមជាមួយវិសាខាបានមួយរដូវកាលនៅឆ្នាំ២០១៩ និងផ្ទេរទៅក្លិបអគ្គិសនីកម្ពុជានៅឆ្នាំ២០២០ តែ ២រដូវកាលនៃការប្រឡូកជាមួយក្លិបសមាជិកលីគកំពូលកម្ពុជានេះ គេធ្វើមិនសូវបានល្អនោះទេ។
រហូតដល់ឆ្នាំ២០២១ បន្ទាប់ពីផ្ទេរទៅក្លិបអង្គរថាយហ្គឺរ ឡុង ម៉េងហាវ បានបង្ហាញទម្រង់លេងគួរឲ្យភ្ញាក់ផ្អើលរាល់ការប្រកួត ដោយបានរួមចំណែកជួយក្រុមយ៉ាងច្រើន ជាក់ស្ដែងគិតត្រឹមសប្ដាហ៍ទី១១ នៃលីគកំពូលកម្ពុជា ម៉េងហាវ រកបាន ៣គ្រាប់ និងបញ្ជូនបាល់ឲ្យមិត្តរួមក្រុមទាត់បញ្ចប់ទី ៤ដង ធ្វើឲ្យក្រុមអង្គរថាយហ្គឺរ ឈរលេខរៀងទី៣ បណ្ដោះអាសន្ន និងមាន ២០ពិន្ទុក្នុងដៃ ពោលគឺចាញ់ប្រៀបក្រុមកំពូលតារាង ២ពិន្ទុប៉ុណ្ណោះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
