ឯកសារមួយច្បាប់ដែលបានឃើញដោយសារព័ត៌មានរ៉យទ័រកាលពីថ្ងៃអង្គារពីក្រសួងការពារជាតិដាក់ជូនទៅគណៈកម្មាធិការថវិការបស់សភា បានបង្ហាញថា កងទ័ពអាល្លឺម៉ង់ មានបំណងបញ្ជាទិញកាំភ្លើងធំ ២០០.០០០គ្រាប់បន្ថែមទៀតពីក្រុមហ៊ុនផលិតអាវុធ Rheinmetall លើសពីអ្វីដែលខ្លួនបានគ្រោងទុក

ឯកសារនោះ បាននិយាយថា កងទ័ពគ្រោងនឹងទទួលបានកាំភ្លើងធំ ១៥៥ មីល្លិម៉ែត្របន្ថែមចំនួន ២០០.០០០ គ្រាប់ ដែលមានតម្លៃប្រហែល ៨៨០ លានអឺរ៉ូ (៩៦០ លានដុល្លារ) ក្នុងកិច្ចព្រមព្រៀងក្របខ័ណ្ឌរបស់ខ្លួនជាមួយក្រុមហ៊ុនការពារជាតិ។ វាបានយល់ព្រមរួចហើយនូវកិច្ចព្រមព្រៀងតម្លៃ ១,២ ពាន់លានអឺរ៉ូសម្រាប់គ្រាប់កាំភ្លើងធំរាប់សែនគ្រាប់ មីស៊ីល និងគ្រាប់រំសេវផ្សេងទៀត។

គ្រាប់កាំភ្លើងធំថ្មីនេះ មានគោលបំណង ដើម្បីបំពេញឃ្លាំងរបស់កងទ័ព ខណៈដែលអាល្លឺម៉ង់ ជួយផ្គត់ផ្គង់អ៊ុយក្រែន ខណៈដែលខ្លួនប្រយុទ្ធនឹងយោធារុស្ស៊ីដែលបានឈ្លានពាន ក្នុងឆ្នាំ ២០២២។

នៅពេលដែលរដ្ឋាភិបាលលោកខាងលិច បង្កើនកម្លាំងយោធារបស់ពួកគេ និងបំពេញឃ្លាំងស្តុករបស់ពួកគេឡើងវិញ បន្ទាប់ពីការផ្គត់ផ្គង់អាវុធដល់ទីក្រុងគីវ ក្រុមហ៊ុន Rheinmetall ដែលតម្លៃទីផ្សាររបស់ពួកគេបានកើនឡើងលើសពី ៤ដង ចាប់តាំងពីសង្រ្គាមនៅអ៊ុយក្រែន កំពុងឃើញការកើនឡើងយ៉ាងខ្លាំងនៃ  ការបញ្ជាទិញ។

តាមរយៈការបញ្ជាទិញនេះ ក្រសួងការពារជាតិអាល្លឺម៉ង់ ក៏ចង់ធានាថា ក្រុមហ៊ុន Rheinmetall អាចបង្កើតខ្សែសង្វាក់ផលិតកម្មថ្មី នៅក្នុងទីក្រុង Unterluess ភាគកណ្តាលនៃប្រទេសអាល្លឺម៉ង់។

ក្រុមហ៊ុន Rheinmetall ជាក្រុមហ៊ុនផលិតកាំភ្លើងធំ និងកាំភ្លើងផ្លោងនៅលើរថក្រោះដ៏ធំបំផុតមួយ ក្នុងពិភពលោក បានចាប់ផ្តើមបង្កើនផលិតកម្ម បន្ទាប់ពីការលុកលុយរបស់រុស្ស៊ីលើអ៊ុយក្រែន ដែលតម្រូវការគ្រាប់រំសេវ បានធ្វើឲ្យកង្វះខាតកាន់តែច្រើន ហើយបានធ្វើឲ្យក្រុមហ៊ុនផលិតនៅអឺរ៉ុបជួបការលំបាកក្នុងការបំពេញតម្រូវការ។