វិមានក្រឹមឡាំង នៅថ្ងៃអង្គារ (ទី៤ ខែមិថុនា) នេះ បាននិយាយថា ខ្លួនល្មមអាចយល់បានថា ហេតុអ្វីបានជាប្រទេសមួយចំនួនបដិសេធមិនចូលរួម ក្នុងកិច្ចប្រជុំសន្តិភាពដែលរៀបចំឡើងដោយប្រទេសស្វីស ស្ដីអំពីបញ្ហាអ៊ុយក្រែន ក្នុងខែនេះ ដោយសារតែការជួបជុំនេះនេះខ្វះគោលដៅច្បាស់លាស់ ហើយវាគឺជារឿងគ្មានប្រយោជន៍អ្វីទាល់តែសោះ ប្រសិនបើគ្មានប្រទេសរុស្ស៊ី នៅក្នុងជំនួបកំពូលបែបនេះ។

ប្រទេសអ៊ុយក្រែនបាននិយាយថា ប្រទេស និងអង្គការជាង ១០០ បានយល់ព្រមចូលរួមកិច្ចប្រជុំកំពូល នាថ្ងៃទី ១៥-១៦ ខែមិថុនា ពោលគឺជាជំនួបកំពូល ដែលទីក្រុងមូស្គូមិនត្រូវបានអញ្ជើញនោះឡើយ។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «នេះគឺជាសកម្មភាពមិនមានប្រយោជន៍អ្វីទាល់តែសោះ ពោលគឺជាសកម្មភាពដែលទំនេរមិនដឹងធ្វើអី»។ លោកបាននិយាយថា វាច្បាស់ណាស់ថា កិច្ចប្រជុំនេះមិនបានផ្តោតឆ្ពោះទៅរកលទ្ធផលនោះទេ ហើយ «នោះហើយជាមូលហេតុដែលប្រទេសជាច្រើនមិនចង់ចំណាយពេលវេលាឥតប្រយោជន៍»។

ហើយវាជាការប៉ះពាល់ដ៏ធ្ងន់ធ្ងរ ចំពោះប្រធានាធិបតីអ៊ុយក្រែន លោក Volodymyr Zelenskiy នៅពេលដែលប្រទេសចិនបាននិយាយថា ខ្លួននឹងមិនចូលរួមក្នុងជំនួបកំពូលនេះទេ ជាអ្វីដែលប្រធានសភារុស្ស៊ីលោក Vyacheslav Volodin បានកត់សម្គាល់ដោយពេញចិត្ត តាមរយៈការបង្ហោះ នៅលើកម្មវិធីផ្ញើសារ Telegram នៅថ្ងៃអង្គារនេះ។

លោក Peskov បានដកស្រង់របាយការណ៍សារព័ត៌មាន ដែលថា ប្រទេសអារ៉ាប៊ីសាអ៊ូឌីត នឹងមិនទៅចូលរួមទេ បើទោះបីជាព្រះរាជាណាចក្រមួយនេះមិនបានប្រកាសជាសាធារណៈ អំពីជំហររបស់ខ្លួន ចំពោះកិច្ចប្រជុំកំពូលនេះក៏ដោយ។ តែយ៉ាងណា លោកបាននិយាយថា នោះគឺជាបញ្ហាអធិបតេយ្យ សម្រាប់អារ៉ាប៊ីសាអ៊ូឌីត។

គួរបញ្ជាក់ថា កិច្ចប្រជុំនេះកំពុងប្រព្រឹត្តទៅ នៅក្នុងពេលវេលាដ៏សំខាន់ សម្រាប់ឆ្នាំទី៣ នៃសង្រ្គាម នៅប្រទេសអ៊ុយក្រែន ដែលកងកម្លាំងរុស្ស៊ី បានកត់ត្រានូវការមានប្រៀបជាបន្តបន្ទាប់ គិតចាប់តាំងពីខែកុម្ភៈមក៕