រដ្ឋបាលសុវត្ថិភាពចរាចរណ៍ផ្លូវហាយវេជាតិ (NHTSA) នៅថ្ងៃអង្គារ (ទី៤ ខែមិថុនា) នេះ បាននិយាយថា ក្រុមហ៊ុន Toyota នឹងប្រមូលមកវិញនូវរថយន្តប្រភេទ SUV និងរថយន្តភីកអាប់ជាង ១០០.០០០គ្រឿង នៅសហរដ្ឋអាមេរិក ដោយសារកម្ទេចកម្ទី នៅក្នុងម៉ាស៊ីន អាចបណ្តាលមានការគាំងបាន។

ការប្រមូលមកវិញនេះ រួមមានរថយន្តភីកអាប់ Toyota Tundra មួយចំនួន និងរថយន្តប្រភេទ SUV គឺ Lexus LX600 ដែលបំពាក់ដោយម៉ាស៊ីន V35A ៦ស៊ីឡាំងរបស់ក្រុមហ៊ុនផលិតរថយន្តជប៉ុន។

NHTSA បានប្រាប់ថា សំណល់កម្ទេចកម្ទីពីដំណើរការផលិត អាចនឹងធ្វើម៉ាស៊ីនកខ្វក់ និងបណ្តាលឲ្យប៊ីដាងសំខាន់ៗមិនដំណើរការ ដែលអាចនាំឲ្យម៉ាស៊ីនគាំង និងបាត់បង់ថាមពលជំរុញទៅម៉ាស៊ីន។ NHTSA បានបន្ថែមថា ដំណោះស្រាយជុសជុល កំពុងស្ថិតក្នុងដំណើរការអភិវឌ្ឍន៍ នាពេលនេះ៕