សារព័ត៌មាន The Moscow Times បានរាយការណ៍កាលពីថ្ងៃអង្គារថា មេដឹកនាំរុស្ស៊ីលោក វ្ល៉ាឌីមៀ ពូទីន បានចាប់ផ្តើមពាក់អាវក្រោះ នៅក្នុងព្រឹត្តិការណ៍សាធារណៈ នៅខាងក្រៅ ដោយបានដកស្រង់សម្តីមន្ត្រីដែលបានឃើញលោក ពូទីន នៅក្នុងព្រឹត្តិការណ៍ទាំងនេះ។

មន្ត្រីម្នាក់ បាននិយាយពីការបង្ហាញខ្លួនរបស់លោក ពូទីន នៅក្នុងក្បួនដង្ហែទិវាជ័យជម្នះទីក្រុងមូស្គូឆ្នាំនេះថា៖ «ឆ្នាំនេះ នៅថ្ងៃទី ៩ ឧសភា មេដឹកនាំរូបនេះ បានពាក់ក្រោះការពារ ក្នុងអំឡុងពេលក្បួនដង្ហែ «ហើយការប្រុងប្រយ័ត្ននោះ ខ្ញុំគិតថា គឺចាំបាច់ណាស់»។

លោកពូទីនដែលបានឈ្នះការបោះឆ្នោតអាណត្តិទី៥ របស់ខ្លួន ជាប្រធានាធិបតីរុស្ស៊ី កាលពីខែមីនា ត្រូវបានគេឃើញស្វាគមន៍ឧត្តមសេនីយ៍ នៅឯក្បួនដង្ហែរយោធាប្រចាំឆ្នាំ នៅក្នុងការផ្សាយបន្តផ្ទាល់ កាលពីថ្ងៃទី៩ ខែឧសភា។ ចលនារបស់មេដឹកនាំ អាយុ ៧១ឆ្នាំ នៅក្នុងវីដេអូមើលទៅតឹងរ៉ឹង ហើយលោក ពូទីន ត្រូវបានគេមើលឃើញថា បានកែសម្រួលសំលៀកបំពាក់របស់ខ្លួននៅជុំវិញស្មាស្តាំ ជាច្រើនដង។

ទីប្រឹក្សាសន្តិសុខ លោកស្រី Jade Miller បានប្រាប់សារព័ត៌មាន The Moscow Times ថា៖«ទម្រង់រាងកាយផ្នែកខាងលើរបស់ពូទីន មើលទៅខុសពីធម្មតា ហើយស្មារបស់លោក ហាក់ដូចជាធំទូលាយ និងរាងការ៉េ ដែលមិនបង្ហាញពីទម្រង់នៃខ្នង និងស្មា។

លោកស្រី បាននិយាយថា៖«តាមគំនិតវិជ្ជាជីវៈរបស់ខ្ញុំ លោក ពូទីន កំពុងពាក់ទម្រង់ការពារមីស៊ីល ក្នុងអំឡុងពេល ដែលលោក ចូលរួមក្នុងក្បួនដង្ហែនោះ»។