អធិការបតីលោក Olaf Scholz នៅថ្ងៃពុធ (ទី៥ ខែមិថុនា) នេះ បានប្រាប់ថា អាល្លឺម៉ង់នឹងទិញយន្តហោះចម្បាំង Eurofighter ចំនួន ២០គ្រឿងបន្ថែម ពីក្រុមហ៊ុន Airbus ខណៈដែលប្រទេសជាសមាជិករបស់អង្គការណាតូ (NATO) មួយនេះ ចំណាយថវិកាយ៉ាងច្រើនបន្ថែមទៀតលើវិស័យការពារជាតិ បន្ទាប់ពីមានការលុកលុយពេញលេញរបស់រុស្ស៊ីលើអ៊ុយក្រែន។

នៅឯកម្មវិធីបើកការតាំងពិពណ៌អាកាសចរណ៍ ILA ខាងក្រៅទីក្រុងប៊ែរឡាំង លោក Scholz បាននិយាយថា លោកមានការប្តេជ្ញាចិត្តយ៉ាងមុតមាំ ក្នុងការបន្ត និងពង្រីកសមត្ថភាពផលិតអាវុធ។

អមដោយការបន្ថែមថា ការបញ្ជាទិញនេះនឹងផ្តល់ភាពប្រាកដប្រជាដល់ក្រុមហ៊ុន Airbus និងក្រុមហ៊ុនផ្គត់ផ្គង់នោះ លោក Scholz បានបញ្ជាក់ថា៖ «នោះហើយជាមូលហេតុដែលយើងនឹងបញ្ជាទិញយន្តហោះចម្បាំង Eurofighter ២០គ្រឿងបន្ថែមទៀត មុនពេលបញ្ចប់សម័យប្រជុំសភានេះ ពោលគឺបន្ថែមពីលើយន្តហោះ ៣៨គ្រឿង ដែលកំពុងស្ថិតនៅក្នុងដំណើរការរៀបចំ»។

គួរបញ្ជាក់ថា កងទ័ពអាកាសរបស់អាល្លឺម៉ង់ចង់ជំនួសយន្តហោះច្បាំងចាស់ៗរបស់ខ្លួន ប្រភេទ Tornado ដោយយន្តហោះចម្បាំង Eurofighter នេះ ដែលត្រូវបានគេស្គាល់ថា យន្តហោះចម្បាំង Typhoon នៅក្នុងប្រទេសអង់គ្លេស។ ហើយបើយោងតាមគេហទំព័ររបស់ក្រុមហ៊ុនផលិតយន្តហោះនេះ បានឲ្យដឹងថា បច្ចុប្បន្ននេះ ខ្លួនដំណើរការយន្តហោះ Eurofighter បានចំនួន ១៣៨គ្រឿង៕