ដោយបានដកស្រង់សម្តីរបស់រដ្ឋមន្ត្រីការបរទេសរុស្ស៊ី លោក Sergei Lavrov ដែលបាននិយាយនៅថ្ងៃពុធ (ទី៥ ខែមិថុនា) នេះ ប្រព័ន្ធផ្សព្វផ្សាយរដ្ឋរុស្ស៊ី បានរាយការណ៍ថា ប្រទេសរុស្ស៊ីនឹងបញ្ជូនការផ្គត់ផ្គង់យោធាបន្ថែម និងគ្រូបង្ហាត់ទៅកាន់ប្រទេសប៊ួគីណាហ្វាសូ ដើម្បីជួយឲ្យប្រទេសអាហ្វ្រិកខាងលិចមួយនេះបង្កើនសមត្ថភាពការពាររបស់ខ្លួន និងប្រយុទ្ធប្រឆាំងអំពើភេរវកម្ម។

គួរបញ្ជាក់ថា ប៊ួគីណាហ្វាសូក្រោមការដឹកនាំរបស់យោធា ចាប់តាំងពីរដ្ឋប្រហារឆ្នាំ២០២២ បានដើរតួនាទីធ្វើជាម្ចាស់ផ្ទះ សម្រាប់ទទួលកងកម្លាំងទាហានស៊ីឈ្នួល Wagner ដែលស្ថាបនិករបស់ក្រុមនេះ គឺលោក Yevgeny Prigozhin បានស្លាប់នៅក្នុងហេតុការណ៍ធ្លាក់យន្តហោះ កាលពីខែសីហាឆ្នាំមុន។

ទីភ្នាក់ងារសារព័ត៌មាន TASS បានដកស្រង់សម្តីលោក Lavrov ដែលអំឡុងដំណើរទស្សនកិច្ចទៅប៊ូគីណាហ្វាសូ បាននិយាយថា៖ «ចាប់តាំងពីទំនាក់ទំនងដំបូង រវាងប្រទេសរបស់យើង បន្ទាប់ពីប្រធានាធិបតី លោក Ibrahim Traoré ឡើងកាន់អំណាច យើងបានចូលរួមយ៉ាងជិតស្និទ្ធលើគ្រប់វិស័យនៃកិច្ចសហប្រតិបត្តិការ ក្នុងនោះរួមទាំងការអភិវឌ្ឍទំនាក់ទំនងយោធា និងបច្ចេកទេសយោធាផងដែរ»។ 

លោកបានប្រាប់សន្និសីទសារព័ត៌មាននៅរដ្ឋធានី Ouagadougou ថា៖ «ខ្ញុំគ្មានការងឿងឆ្ងល់ទេថា ដោយសារកិច្ចសហប្រតិបត្តិការនេះ តំបន់នៃអំពើភេរវកម្មដែលនៅសល់លើទឹកដីរបស់ប្រទេសប៊ួគីណាហ្វាសូ នឹងត្រូវបំផ្លាញបានជាមិនខាន»។

សូមបញ្ជាក់បន្ថែមថា ចាប់តាំងពីការចាប់ផ្តើមនៃសង្រ្គាមនៅអ៊ុយក្រែន លោក Lavrov បានធ្វើទស្សនកិច្ចជាបន្តបន្ទាប់ទៅកាន់ទ្វីបអាហ្រ្វិក ខណៈរុស្ស៊ី ដែលរងការដាក់ទណ្ឌកម្មរបស់លោកខាងលិច ស្វែងរកដៃគូពាណិជ្ជកម្មថ្មី និងព្យាយាមប្រមូលផ្តុំប្រទេសកំពុងអភិវឌ្ឍន៍ នៅពីក្រោយចក្ខុវិស័យរបស់ខ្លួន ស្ដីអំពីការមាន «ពិភពលោកពហុប៉ូល» ដែលលែងស្ថិតនៅក្រោមការគ្រប់គ្រងរបស់សហរដ្ឋអាមេរិក និងអតីតប្រទេសមហាអំណាចអាណានិគម នៅតំបន់អឺរ៉ុប៕