បន្ទាយមានជ័យ៖ ឯកឧត្តមអភិបាលខេត្តបន្ទាយមានជ័យ បានអញ្ជើញក្នុងកិច្ចប្រជុំ ពិគ្រោះយោបល់ស្តីពីដំណើរការជ្រើសរើសបេក្ខភាពអង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល នៅសាលប្រជុំ "ក "សាលាខេត្តបន្ទាយមានជ័យ នាព្រឹកថ្ងៃទី០៦ ខែមិថុនា ឆ្នាំ ២០២៤។

ឯកឧត្តម អ៊ុំ រាត្រី អភិបាលខេត្ត បានលើកឡើងថា វិស័យអប់រំ និងវិស័យសុខាភិបាល គឺជាអង្គភាពអាទិភាព ​ដែលត្រូវដើរតួនាទីយ៉ាងសំខាន់ក្នុងការ ទ្រទ្រង់នូវការបណ្តុះបណ្តាល​សមត្ថភាព​ និងការអប់រំ ​ថែទាំសុខភាព ត្រូវដើរទន្ទឹមគ្នា​ និងត្រូវយកចិត្តទុកដាក់ក្នុងការបង្កើន ប្រសិទ្ធភាព ​និងគុណភាពក្នុងការផ្តល់សេវា ​ឱ្យកាន់តែប្រសើរឡើង ស្របតាមយុទ្ធសាស្រ្ត​បញ្ចកោណ ​ដំណាក់កាលទី១ របស់រាជរដ្ឋាភិបាល​ អាណត្តទី៧នៃរដ្ឋសភា បានចាត់អាទិភាព​គន្លឹះទាំង៥ មនុស្ស ផ្លូវ ទឹក ភ្លើង និងបច្ចេកវិទ្យា បន្តពីយុទ្ធសាស្រ្តចតុកោណដំណាក់កាលទី៤ ក្នុងអាណត្តិទី៦កន្លងទៅ ដែលបានចាត់អាទិភាពគន្លឹះចំនួន៤គឺ៖ ផ្លូវ ទឹក ភ្លើង និង មនុស្ស។ ទន្ទឹមនឹងនោះ ឯកឧត្តម ក៏បានជំរុញដល់អង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល ជាពិសេសវិស័យអប់រំ លើកទឹកចិត្តដល់គ្រប់សាលា គ្រប់កម្រិត ជាពិសេសមត្តេយ្យសិក្សា ក្នុងការរៀបចំឱ្យទៅតាមលក្ខណៈស្តង់​ ប្រកបដោយភាពទាក់ទាញ ដើម្បីចូលរួមក្នុងការប្រឡងប្រជែងយកសាលាគំរូ។

ឯកឧត្តមអភិបាលខេត្ត ក៏បានធ្វើការកោតសរសើរដល់សាលាមេត្តយ្យ សិក្សាធនធាន កកោះ ដែលជាសាលាគំរូ របស់ខេត្តបន្ទាយមានជ័យ ហើយកន្លងក៏បានទៅចូលរួមប្រឡងនៅថ្នាក់ជាតិ ទទួលបានជ័យលាភីផងដែរ។ ដូច្នេះឯកឧត្ដម​ ជំរុញដល់បណ្តាសាលា​ ទាំងអស់ ត្រូវយក​គំរូតាមសាលាមេត្តយ្យ សិក្សាធនធានកកោះ ដើម្បីយកទៅអនុវត្ត ក្លាយជាសាលាគំរូរបស់ខេត្ត៕ អត្ថបទ រឿង ចន្ទ្រា