លោក បេនចាមីន ណេតាន់យ៉ាហ៊ូ បានប្តេជ្ញាថា នឹងចាត់វិធានការយ៉ាងខ្លាំងក្លាប្រឆាំងនឹងក្រុមហេសបូឡា បន្ទាប់ពីកងកម្លាំងការពារអ៊ីស្រាអែល (IDF) បាននិយាយថា ពួកគេត្រៀមខ្លួនរួចជាស្រេចសម្រាប់ «ការវាយប្រហារនៅភាគខាងជើង»។

នាយករដ្ឋមន្ត្រីអ៊ីស្រាអែលរូបនេះ បានធ្វើដំណើរទៅកាន់ព្រំដែនភាគខាងជើងរបស់ប្រទេសជាមួយប្រទេសលីបង់ កាលពីថ្ងៃពុធ ហើយបាននិយាយថា «អ្នកណាដែលគិតថា ពួកគេអាចធ្វើបាបយើង ហើយយើងនឹងអង្គុយដោយស្ងៀមស្ងាត់ នោះ គឺជាកំហុសដ៏ធំមួយ។ យើងត្រូវបានរៀបចំសម្រាប់សកម្មភាពដ៏ខ្លាំងក្លាមួយ នៅភាគខាងជើង។ តាមមធ្យោបាយមួយ ឬមធ្យោបាយផ្សេងទៀត យើងនឹងស្ដារសន្តិសុខឡើងវិញ នៅភាគខាងជើង»។

ភ្លើងចំហេះព្រៃ កំពុងរាលដាលនៅភាគខាងជើងនៃប្រទេសអ៊ីស្រាអែល ដោយសារការវាយប្រហាររបស់ក្រុមហេសបូឡា។ យ៉ាងហោចណាស់ជនជាតិអ៊ីស្រាអែល ១០០.០០០នាក់ ត្រូវបានផ្លាស់ទីលំនៅ ចាប់តាំងពីក្រុមភេរវករ បានចាប់ផ្តើមប្រតិបត្តិការសាមគ្គីភាព បន្ទាប់ពីការវាយប្រហាររបស់ក្រុមហាម៉ាសលើអ៊ីស្រាអែលកាលពីថ្ងៃទី៧ ខែតុលា ហើយមនុស្សរាប់ម៉ឺននាក់ទៀត ត្រូវបានផ្លាស់ទីលំនៅ នៅភាគខាងត្បូងប្រទេសលីបង់។

ប្រជាជនអ៊ីស្រាអែល នៅតែរស់នៅមិនឆ្ងាយពីព្រំដែន កំពុងស៊ូទ្រាំនឹងការវាយប្រហារជារៀងរាល់ថ្ងៃជាមួយនឹងគ្រាប់មីស៊ីលជាង ៣.000 គ្រាប់ ដែលត្រូវបានបាញ់ឆ្ពោះទៅរកអ៊ីស្រាអែលពីប្រទេសលីបង់ ចាប់តាំងពីការចាប់ផ្តើមនៃសង្រ្គាមនេះ។

ភ្លើងចំហេះព្រៃ បានឆាបឆេះអស់ជាច្រើនថ្ងៃ បន្ទាប់ពីមានការបាញ់គ្រាប់រ៉ុក្កែតរបស់ក្រុមហេសបូឡា។ ក្រុមអ្នកពន្លត់អគ្គិភ័យ បាននិងកំពុងប្រយុទ្ធ ដើម្បីទប់ស្កាត់ភ្លើងដែលបានកើនឡើង ក្នុងប៉ុន្មានសប្តាហ៍ថ្មីៗនេះ ហើយកាន់តែធ្ងន់ធ្ងរឡើង ដោយសារសីតុណ្ហភាព កើនឡើង។