​បាល់ទាត់៖ ក្រុម​ជម្រើស​ជាតិ​យុវជន​អាយុ​ក្រោម ២៣​ឆ្នាំ​កម្ពុជា​នឹង​ត្រូវ​ប្រជែង​កៅអី​ជុំ​ផ្ដាច់​ព្រ័ត្រ​នៃ​ពានរង្វាន់​ជើងឯក​យុវជន​អាយុ​ក្រោម ២៣​ឆ្នាំ​ប្រចាំ​ទ្វីប​អាស៊ី (AFC U-23 Asian Cup 2022) ជាមួយ​ជប៉ុន និង​ហុងកុង បន្ទាប់ពី​ហុងកុងត្រូវបាន​ចាប់ឆ្នោត​បង្គ្រប់​ពូ​ល K ក្នុង​វគ្គ​ជម្រុះ​ពានរង្វាន់​យុវជន​ជើងឯក​អាស៊ី​នេះជំនួស​កៅអី​ក្រុម U23 កូរ៉េខាងជើងដែល​បាន​ដកខ្លួនកាល​ពី​ថ្មីៗ។​

​ការចាប់​ឆ្នោត​នេះបានធ្វើ​ឡើង​នៅ​ទីក្រុង​គូ​ឡា​ឡាំ​ពួរកាលពី​ថ្ងៃទី​១១ ខែសីហា​ម្សិលមិញ បន្ទាប់ពី​កូរ៉េខាងជើងបាន​ដកខ្លួន​ពី​ពូ​ល K ដែល​នាំ​ឲ្យ​ពូ​ល​នេះ​សល់​ត្រឹម ២​ក្រុមគឺ​កម្ពុជា និង​ជប៉ុន។ ដោយហេតុនេះដើម្បី​អាច​បន្ដ​ការប្រកួត​ពូ​ល​នេះ​បាន សហព័ន្ធ​កីឡាបាល់ទាត់​ទ្វីបអាស៊ី (AFC) ក៏បាន​សម្រេច​ធ្វើការ​ចាប់ឆ្នោត​ពូ​ល G, H, I និង​ពូ​ល J ចំនួន ៨​ក្រុមដើម្បី​ស្វែង​រក ១​ក្រុមមក​បង្គ្រប់​ពូ​ល K ឲ្យ​បាន ៣​ក្រុម​ឡើងវិញ​។​ ចំពោះ ៨​ក្រុមដែល​ត្រូវបាន​ជ្រើសរើស​ចូលមក​ចាប់ឆ្នោត​ឡើងវិញ រួមមាន​ពូ​ល G មាន​ចិន និង​ព្រុយ​ណេ​, ពូ​ល​ H មាន​ទី​ម័​រ​ខាងកើត និង​ហ្វីលីពីន​, ពូ​ល I មាន​មី​យ៉ាន់​ម៉ា និង​ហុងកុង និង​ពូ​ល J មាន​ម៉ាឡេស៊ី និង​ឡាវ​។ ជា​លទ្ធផល​ហុងកុងដែល​ស្ថិតក្នុង​ពូ​ល I បាន​ចាប់ឆ្នោត​ចូលមក​ពូ​ល K ជាមួយ​កម្ពុជា និង​ជប៉ុន ធ្វើ​ឲ្យ​ពូ​ល I នៅសល់​បេក្ខភាព​ប្រកួតប្រជែង​ត្រឹម ៣​ក្រុម​ដូចគ្នា រួមមាន​វៀតណាម មី​យ៉ាន់​ម៉ា និង​ឆាយ​នី​ស​តៃប៉ិ។​

ចំពោះ​កម្មវិធី​ប្រកួត​វគ្គ​ជម្រុះ​ពានរង្វាន់ AFC U-23 Asian Cup 2022 គ្រោង​ចាប់ផ្ដើម​ពី​ថ្ងៃ​ទី​២៣ ដល់​ថ្ងៃទី​៣១ ខែតុលា ឆ្នាំ​២០២១ ខាងមុខ ក្នុងនោះ​កម្ពុជាត្រូវ​ជួប​ហុងកុងនា​ថ្ងៃទី​២៧-​តុលា និង​ជួប​ជប៉ុននា​ថ្ងៃទី​២៩-​តុលា។ សម្រាប់​ក្រុម​ឈរ​លេខ​១ នៃ​ពូ​ល​នីមួយៗ រួមទាំង​ក្រុម​ឈរ​លេខ​២ ល្អ​ជាងគេ​ចំនួន ៤​ក្រុមក្នុងចំណោម ១១​ពូ​លនឹង​បាន​ឡើងទៅ​ជុំ​ផ្ដាច់ព្រ័ត្រ នៅ​ប្រទេស​អ៊ូ​បេ​គី​ស្ថាននា​ឆ្នាំ​២០២២ ខាងមុខ៕

អត្ថបទ៖ លី ឈុន​ឡា