ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) បានបញ្ជាក់កាលពីថ្ងៃព្រហស្បតិ៍ថា ជនជាតិបារាំងម្នាក់ ត្រូវបានឃាត់ខ្លួន នៅទីក្រុងមូស្គូ ប៉ុន្តែបានបដិសេធថា បុរសនោះ មិនបានធ្វើការឲ្យរដ្ឋាភិបាលបារាំងនោះទេ។

លោកម៉ាក្រុង បាននិយាយថា៖ «គាត់មិនបានធ្វើការឲ្យប្រទេសបារាំងទេ។ ឥឡូវនេះ យើងមានការប្រុងប្រយ័ត្នខ្ពស់ គាត់នឹងទទួលបានការការពារពីកុងស៊ុលដែលអនុវត្តនៅក្នុងករណីបែបនេះ។ ខ្ញុំចង់និយាយការពិតអំពីការឃោសនា ដែលយើងបានឮ»។

គណៈកម្មាធិការស៊ើបអង្កេតរបស់រុស្ស៊ី បាននិយាយកាលពីព្រឹកថ្ងៃព្រហស្បតិ៍ថា ពលរដ្ឋបារាំងម្នាក់ដែលធ្វើការឲ្យមជ្ឈមណ្ឌលស្វ៊ីសសម្រាប់កិច្ចសន្ទនាមនុស្សធម៌មិនរកប្រាក់ចំណេញ ត្រូវបានឃុំខ្លួនពីបទសង្ស័យថា «ប្រមូលព័ត៌មានដែលពាក់ព័ន្ធនឹងសកម្មភាពយោធារបស់សហព័ន្ធរុស្ស៊ី»។

វីដេអូដែលចេញផ្សាយដោយគណៈកម្មាធិការស៊ើបអង្កេត បានបង្ហាញថា បុរសនោះ ត្រូវបានចាប់ខ្លួនដោយបុគ្គលិកសន្តិសុខ នៅហាងកាហ្វេមួយក្នុងទីក្រុងមូស្គូ ហើយដាក់ចូលទៅក្នុងរថយន្តយោធាមួយ គ្រឿង។

គណៈកម្មាធិការស៊ើបអង្កេត បានចោទប្រកាន់ជនជាតិបារាំងរូបនេះ បានប្រមូលព័ត៌មានអំពី «សកម្មភាពបច្ចេកទេសយោធា និងយោធា»របស់រុស្ស៊ីអស់រយៈពេលជាច្រើនឆ្នាំ ហើយមិនបានចុះឈ្មោះជាភ្នាក់ងារបរទេសទេ។