ទស្សនាវដ្ដី Spiegel នៅថ្ងៃសុក្រ (ទី៧ ខែមិថុនា) នេះ បានរាយការណ៍ថា ប្រទេសអាល្លឺម៉ង់នឹងត្រូវការកងទ័ពបន្ថែមទៀតយ៉ាងហោចណាស់ ៧៥.០០០នាក់ ដើម្បីបំពេញតាមការប្តេជ្ញាចិត្តរបស់អង្គការណាតូ (NATO) ខណៈសម្ព័ន្ធភាពមួយនេះសម្របតាមផែនការការពាររបស់ខ្លួន ដើម្បីប្រឈមមុខនឹងអ្វីដែលខ្លួនមើលឃើញថា ការមានអរិភាពកាន់តែខ្លាំងឡើងៗជាមួយរុស្ស៊ី។

នៅក្នុងកិច្ចប្រជុំកំពូលរបស់ពួកគេ នាទីក្រុង Vilnius ប្រទេសលីទុយអានី កាលពីឆ្នាំមុន បណ្ដាមេដឹកនាំក្នុងប្រទេសជាសមាជិកនៃអង្គការណាតូ បានចុះហត្ថលេខាលើផែនការការពារជាតិដ៏សំខាន់ជាលើកដំបូង គិតចាប់តាំងពីការបញ្ចប់សង្គ្រាមត្រជាក់ ដោយរៀបរាប់លម្អិតអំពីរបៀបដែលសម្ព័ន្ធមិត្ត នឹងឆ្លើយតបនឹងការវាយប្រហាររបស់រុស្ស៊ី។

ចំណាត់ការនេះបានបង្ហាញឲ្យឃើញពីការផ្លាស់ប្តូរដ៏សំខាន់មួយ ពោលគឺអង្គការណាតូបានមើលឃើញថា ខ្លួនមិនចាំបាច់រៀបចំផែនការបែបនេះអស់ជាច្រើនទសវត្សរ៍មកហើយ ដោយសារខ្លួនបានប្រយុទ្ធក្នុងសង្គ្រាមតូចៗ នៅក្នុងប្រទេសអាហ្វហ្គានីស្ថាន និងអ៊ីរ៉ាក់ ហើយប្រាកដក្នុងចិត្តថា រុស្ស៊ីក្រោយសម័យសូវៀត លែងបង្កការគំរាមកំហែងជាអត្ថិភាពទៀតហើយ។

យោងតាមមន្ត្រីជាន់ខ្ពស់របស់យោធាអាល្លឺម៉ង់ បានឲ្យដឹងថា អង្គការណាតូ និងអ្នករៀបចំផែនការយោធាជាតិ បាន និងកំពុងមមាញឹកក្នុងការកែប្រែផែនការទៅជាតម្រូវការជាក់ស្តែង ដោយកំណត់អត្តសញ្ញាណកង្វះខាតកងទ័ព អាវុធ និងឧបករណ៍ផ្សេងទៀតដែលត្រូវការ ដើម្បីការពារប្រឆាំងនឹងការវាយប្រហាររបស់រុស្ស៊ី ដែលអាចកើតមាននៅដើមឆ្នាំ២០២៩។

ដោយយោងទៅឯកសារសម្ងាត់ តែមិនផ្ដល់ព័ត៌មានលម្អិតបន្ថែមនោះ ទស្សនាវដ្ដី Spiegel បានឲ្យដឹងថា តម្រូវការថ្មីរបស់ណាតូ មានន័យថា Bundeswehr (កងកម្លាំងប្រដាប់អាវុធសហព័ន្ធអាល្លឺម៉ង់) នឹងត្រូវការទាហានបន្ថែមចំនួន ៧៥.០០០នាក់ ដើម្បីបំពេញអង្គភាព កងពលធំ និងកងពលតូចរបស់សម្ព័ន្ធមិត្ត ដែលត្រូវការដើម្បីអនុវត្តផែនការការពារជាតិ៕