ថ្លែងក្នុងកម្មវិធីសំឡេងទីតាំងបេតិកភណ្ឌ «ដើរកម្សាន្តនៅ​យូណាន ​ទៅទស្សនានៅអង្គរ» ឯកឧត្តម ​នេត្រ ភក្ត្រា រដ្ឋមន្ត្រីក្រសួងព័ត៌មានបានលើកឡើងថា កម្មវិធី«ដើរកម្សាន្តនៅយូណាន ទៅទស្សនា​នៅអង្គរ» នឹងផ្តល់ឱកាសដ៏ល្អសម្រាប់យើងទាំងអស់គ្នា យល់ដឹងអំពី​ភាពស្រស់ស្អាត នៃ​តំបន់​បេតិក​ភណ្ឌពិភពលោកនៅប្រទេសកម្ពុជា និងនៅខេត្តយូណាន និងស្វែងយល់អំ​ពី​ប្រវត្តិ​សាស្ត្រ​ដ៏យូរលង់ ជាមួយនឹងវប្បធម៌ដ៏ទាក់ទាញសម្រាប់វិស័យទេសចរណ៍។

កម្មវិធីសំឡេងទីតាំងបេតិកភណ្ឌ «ដើរកម្សាន្តនៅ​យូណាន ​ទៅទស្សនានៅអង្គរ» បាន​រៀបចំ​កាល​ពីថ្ងៃទី៧ ខែមិថុនា ឆ្នាំ២០២៤ នៅទីក្រុង​គួនមីង ខេត្តយូណាន ប្រទេសចិន ក្រោម​អធិបតី​ភាព​ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវជឹង យៀន សមាជិកអចិន្ត្រៃយ៍ និង​ជាប្រធានផ្នែកឃោសនាការនៃគណៈកម្មាធិការគណបក្សកុម្មុយនិស្តចិនខេត្តយូណាន ព្រមទាំង​វត្តមានតំណាងក្រសួងទេសចរណ៍ តំណាងសមាគមអ្នកសារព័ត៌មាន និងទីភ្នាក់​ងារ​ទេសចរណ៍​ព្រមទាំងក្រុមហ៊ុនវិនិយោគជាច្រើនទៀត។

ក្នុងពិធីបើក​សម្ពោធកម្មវិធីនេះ មានការ សម្តែងសិល្បៈនិងទស្សនីយភាពរបស់ប្រទេស​កម្ពុជា និង​ចិនដែលបានបង្ហាញពីសក្តានុពលទេសចរណ៍របស់ខ្លួនរៀងៗខ្លួន។

កម្មវិធី«ដើរកម្សាន្តនៅយូណាន ទៅទស្សនាអង្គរ» ត្រូវបានរៀបចំឡើងដើម្បីការពង្រឹងការផ្លាស់​ប្តូរវ​ប្បធម៌ ទេសចរណ៍ និងកិច្ចសហប្រតិបត្តិការរវាងប្រជាជននិងប្រជាជន ក្នុងគោល​បំណង​លើក​កម្ពស់ទំនាក់ទំនងកម្ពុជា-ចិនឱ្យកាន់តែរឹងមាំ និងរស់រវើកក្នុងយុគសម័យថ្មី។

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានសង្កត់ធ្ងន់ថា «ក្នុងនាមជាស្ថាប័នប្រព័ន្ធផ្សព្វផ្សាយព័ត៌មាន យើងខ្ញុំមានការទទួលខុសត្រូវក្នុងការផ្សព្វផ្សាយ​អំពី​កិច្ច​សហប្រតិបត្តិការកម្ពុជា-ចិនទៅកាន់ពិភពលោក តាមរយៈវេទិកា​ប្រព័ន្ធ​ផ្សព្វ​ផ្សាយ​ចម្រុះ​ទាំងបុរាណ និងទំនើប និងបច្ចេកវិទ្យាឌីជីថល ដើម្បីបង្ហាញនូវភាពទាក់ទាញដ៏ពិសេស និង​ប្រកប​ដោយសក្តានុពលនៃបេតិកភណ្ឌពិភពលោកនៅកម្ពុជា និងខេត្តយូណានប្រទេសចិន និង​សមិទ្ធផល​ដែលទទួលបានពីកិច្ចសហប្រតិបត្តិការរវាងភាគីកម្ពុជា-ចិន ក្នុងការជំរុញ​ការ​អភិវឌ្ឍ​វិស័យ​ទេសចរណ៍ និងវប្បធម៌ ដើម្បីទាក់ទាញការចាប់អារម្មណ៍និងការគាំទ្រ សំដៅ​ពង្រឹង​ការ​ការពារ និង​អភិរក្សបេតិកភណ្ឌរួមរបស់មនុស្សជាតិ»។

ឯកឧត្តមរដ្ឋមន្ត្រី បានបង្ហាញនូវសុទិដ្ឋិនិយមថា តាមរយៈការរៀបចំយុទ្ធនាការ និងព្រឹត្តិការណ៍​ទេសចរណ៍​នានារវាងកម្ពុជា-ចិន នឹងធ្វើឱ្យមានការទាក់ទាញ​ភ្ញៀវ​ទេសចរ​កាន់​តែ​ខ្លាំង​ឱ្យ​ដើរ​កម្សាន្ត ហើយក្នុងនោះប្រព័ន្ធ​ផ្សព្វផ្សាយ​ព័ត៌មានពិតជាដើរតួនាទីសំខាន់ក្នុង​ការបញ្ជូន​សារ​អំពី​កញ្ចប់​ទេសចរណ៍ សក្តានុពលទេសចរណ៍ផ្សេងៗដល់សាធារណជន។

ក្នុងឪកាសនោះដែរ លោកជំទាវជឹង យៀន ជឿជាក់ថា កម្មវិធីសំឡេង​ទីតាំង​បេតិកភណ្ឌ​«ដើរ​កម្សាន្ត​នៅ​យូណាន ទៅទស្សនានៅអង្គរ» នឹងធ្វើឱ្យវិស័យ​ទេសចរណ៍​នៃប្រទេសទាំងពីរ​កាន់​តែមាន​ការរីកចម្រើន។

យោងតាមទិន្នន័យរបស់ក្រសួងទេសចរណ៍, នៅឆ្នាំ២០២៣ កន្លងទៅនេះ កម្ពុជាបាន​ទទួល​ភ្ញៀវ​ទេសចរចំនួន ៥,៤៥លាននាក់ក្នុងនោះទេសចរជនជាតិចិនមានចំនួន ៥៥ ម៉ឺននាក់ ហើយនៅ ៣ ខែដើមឆ្នាំ២០២៤ នេះ កម្ពុជាទទួលបានភ្ញៀវទេសចរចំនួន ១,៥៨លាននាក់ ក្នុងនោះទេ​សចរ​ជន​ជាតិចិនមានចំនួន ១៩ ម៉ឺននាក់៕