ប្រជាជននៅក្នុងរដ្ឋធានីប្រទេសឥណ្ឌា បានឈរតម្រង់ជួរយ៉ាងវែងនៅជិតរថយន្តដឹកទឹក កាល​ពី​ថ្ងៃសុក្រ ខណៈពួកគេបន្តប្រឈមមុខទៅនឹងកង្វះទឹកធ្ងន់ធ្ងរ ក្នុងពេលប្រភពទឹក បានរីងស្ងួត​ដោយ​សារ​តែរលកកម្តៅខ្លាំង។

ប្រជាជន នៅតំបន់សំណង់មិនរៀបរយមួយកន្លែងក្នុងតំបន់ Okhla Phase-2 នៅទីក្រុង New Delhi ត្រូវបានគេមើលឃើញ កំពុងប្រមូលផ្តុំគ្នានៅជុំវិញរថយន្តដឹកទឹក បន្ទាប់ពីរថយន្ត​បាន​មក​ដល់ភ្លាម​ៗ។ ពលរដ្ឋនិយាយថា ទោះជាយ៉ាងណា ទឹកបានមកពីរថយន្តដឹកទឹក មិនគ្រប់គ្រាន់​សម្រាប់​កម្រិត​ប្រើប្រាស់របស់ពួកគេនោះទេ។

ទន្ទឹមនឹងនេះ រដ្ឋមន្ត្រីក្រសួងសាធារណការទីក្រុង Delhi លោក Atishi បានពិនិត្យរោងចក្រ​ប្រព្រឹត្តិកម្ម​ទឹក Wazirabad និងបាននិយាយថា វិបត្តិនេះ គឺដោយសារតែកម្រិតទឹកទាប​នៅ​ក្នុងទន្លេ Yamuna ដែលជាប្រភពទឹកចម្បង របស់ទីក្រុង Delhi។

កាលពីពេលថ្មីៗនេះ តុលាការកំពូលរបស់ប្រទេសឥណ្ឌា បានបង្គាប់ឱ្យរដ្ឋតំបន់ភ្នំ ហ៊ីម៉ាឆាល ប្រទេស(Himachal Pradesh) បញ្ចេញទឹក ចូលទៅក្នុងអាងស្តុកទឹក Wazirabad ទីក្រុង New Delhi តាមរយៈទំនប់ក្នុងស្រុកមួយ នៅភាគខាងជើងរដ្ឋ Haryana ដើម្បីជួយរដ្ឋធានី ទប់ទល់វិបត្តិនេះ។

ការកើតឡើងស្របគ្នានៃកត្តាជាច្រើន បាននាំឱ្យមានរដូវក្តៅ ក្តៅខ្លាំងនៅអាស៊ីខាងត្បូង ជា​និន្នាការ​មួយ ដែលអ្នកវិទ្យាសាស្ត្រនិយាយថា កាន់តែធ្ងន់ធ្ងរទៅៗដោយបម្រែបម្រួលអាកាសធាតុ បង្កឡើងដោយមនុស្ស។

ទីក្រុង New Delhi បានកត់ត្រាសីតុណ្ហភាពប្រហែល៥០ អង្សាសេ ជាលើកដំបូងក្នុងសប្តាហ៍នេះ ដោយបង្ខំឱ្យអាជ្ញាធររឹតត្បិតការផ្គត់ផ្គង់ទឹក បិទសាលារៀន និងបង្កើតមជ្ឈមណ្ឌលជំងឺ​សុរិយៈ​រោគ​នៅ​តាមមន្ទីរពេទ្យ។