សមាជិកសភារដ្ឋញូវយ៉ក កាលពីថ្ងៃសុក្រ (ទី៧ ខែមិថុនា) បានអនុម័តច្បាប់ ដើម្បីរា​រាំង​មាតិកា​របស់​បណ្ដាញសង្គមមិនឲ្យបង្ហាញខ្លឹមសារ «ដែលធ្វើឲ្យញៀន» ដល់អ្នកប្រើប្រាស់​ដែល​មាន​អាយុ​ក្រោម ១៨ឆ្នាំ​ ដោយគ្មានការយល់ព្រមពីឪពុកម្ដាយរបស់ពួកគេ ដែលការសម្រេ​ចនេះ​បាន​ធ្វើ​ឲ្យ​រដ្ឋ​​​នេះក្លាយជារដ្ឋចុងក្រោយបំផុត ក្នុងចំណោមរដ្ឋជាច្រើន ដែលចាត់​វិធាន​ការ​កំណត់​ហានិភ័យ​តាម​ប្រព័ន្ធ​អ៊ីនធឺណិត ចំពោះកុមារ។

សេចក្ដីស្នើច្បាប់ ដើម្បីដាក់កម្រិតលើគេហទំព័រអនឡាញ ទាំងមិនឲ្យប្រមូល និងលក់​ទិន្នន័យ​ផ្ទាល់ខ្លួន​របស់អ្នកប្រើប្រាស់មិនទាន់គ្រប់អាយុ ក៏ទទួលបាន​ការ​អនុម័ត​ចុង​ក្រោយ​នៅ​ក្នុង​សភា​រដ្ឋ​ញូវយ៉ក នាថ្ងៃទី៧ ខែមិថុនានោះដែរ ពោលគឺមានរយៈពេលមួយថ្ងៃបន្ទាប់ពីវិធានការនេះ ត្រូវ​បាន​ធ្វើ​ឲ្យជ្រះស្រឡះ នៅព្រឹទ្ធសភារដ្ឋ។

គេរំពឹងថា អភិបាលរដ្ឋ លោកស្រី Kathy Hochul នឹងចុះហត្ថលេខាឲ្យក្លាយជាច្បាប់ជាធរមាន ចំពោះ​ច្បាប់នេះ។ លោកស្រីបានសាទរចំពោះវិធានការនេះថា៖ «នេះជាជំហាន​ប្រវត្តិសាស្ត្រ​ឆ្ពោះ​ទៅមុខ​ក្នុង​កិច្ចខិតខំប្រឹងប្រែងរបស់យើង ដើម្បីដោះស្រាយវិបត្តិសុខភាពផ្លូវចិត្តរបស់យុវជន និង​បង្កើត​បាន​នូវ​​បរិយាកាសឌីជីថល ដែលមានសុវត្ថិភាពជាងមុន សម្រាប់ពួកយុវជន»។

ក្រោយមានច្បាប់នេះ បណ្ដាក្រុមហ៊ុនបណ្ដាញសង្គម ដូចជា Meta Platforms ជាដើម ដែល​មាតិកា​របស់ក្រុមហ៊ុន រួមមាន Facebook និង Instagram អាចប៉ះពាល់យ៉ាងធ្ងន់ធ្ងរ​ដល់​ចំណូល​របស់ពួកគេ។

អ្នកគាំទ្រចំពោះច្បាប់នេះ បានចង្អុលបង្ហាញដល់ការសិក្សារបស់សាកលវិទ្យាល័យ Harvard ថ្មីៗ​នេះ ដែលបានរកឃើញថា មាតិកា​បណ្ដាញសង្គមធំៗបំផុតចំនួន៦ រកចំណូលបាន ១១ពាន់​លាន​ដុល្លារ​អាមេរិក ពីការផ្សាយពាណិជ្ជកម្ម ពាក់ព័ន្ធនឹងនីតិជន ក្នុងឆ្នាំ២០២២។

ហើយជាមួយគ្នានេះ អ្នកគាំទ្រឲ្យមាននូវសេចក្ដីព្រាងច្បាប់នេះ ក៏ដកស្រង់​ការ​សិក្សា​ដែល​ភ្ជាប់​ពី​ការ​មាន​អត្រា​ខ្ពស់នៃជំងឺធ្លាក់ទឹកចិត្ត ការថប់បារម្ភ ការគេងមិនលក់ និងបញ្ហាសុខភាពផ្លូវ​ចិត្ត​ផ្សេង​ទៀត ទៅនឹងអ្វីដែលពួកគេកំណត់ថា ជាការប្រើប្រាស់បណ្ដាញ​សង្គម​ហួស​ហេតុរបស់មនុស្សវ័យជំទង់៕