អូឡាំពិក៖ អត្តពលិកអូស្ត្រាលីមួយចំនួន ប្រឈមនឹងការធ្វើចត្តាឡីស័ករហូតដល់ ២៨ថ្ងៃបន្ទាប់ពីត្រលប់ពីការចូលរួមព្រឹត្តិការណ៍អូឡាំពិករដូវក្តៅ នៅទីក្រុងតូក្យូប្រទេសជប៉ុន។ អត្តពលិកដែលធ្វើដំណើរឆ្លងកាត់ទីក្រុងស៊ីដនីទៅកាន់រដ្ឋ South Australia កំពុងប្រឈមមុខនឹងការដាក់ឲ្យនៅដាច់ដោយឡែក ២សប្តាហ៍បន្ថែមទៀតនោះគឺលើសពី ២សប្តាហ៍ដែលត្រូវកំណត់រួចហើយ សម្រាប់ការមកដល់ពីក្រៅប្រទេសទាំងអស់។
គណៈកម្មាធិការអូឡាំពិកអូស្ត្រាលី AOC បាននិយាយថា ស្របពេលដែលប្រទេសជាច្រើនគេនាំគ្នាអបអរសាទរការវិលមកវិញពីអូឡាំពិកទីក្រុងតូក្យូនោះ អត្តពលិកអូស្ត្រាលីមួយចំនួនបែរជាទទួលបានការតបស្នងមិនសមរម្យបែបនេះ។ មកដល់ពេលនេះអត្តពលិក ១៦នាក់របស់អូស្ត្រាលីកំពុងធ្វើចត្តាឡីស័កនៅទីក្រុងស៊ីដនី ដែលជារដ្ឋធានីនៅរដ្ឋ New South Wales។ រដ្ឋបាលនៃរដ្ឋ South Australia បានឱ្យដឹងថា ហានិភ័យខ្ពស់នៃការឆ្លងរីករាលដាលនៃមេរោគ Covid-19 បម្លែងខ្លួនថ្មីនៅរដ្ឋ New South Wales គឺជាហេតុផលចម្បងដែលរដ្ឋបាលរបស់លោក តម្រូវឱ្យមានការរឹតបន្តឹងការចញចូលនេះ។
សូមបញ្ជាក់ថា អូស្ត្រាលីបានបញ្ជូនអត្តពលិកសរុប ៤៧៨នាក់ទៅកាន់អូឡាំពិកទីក្រុងតូក្យូ និងត្រលប់មកវិញដោយឈរចំណាត់ថ្នាក់លេខ ៦ ក្នុងតារាងមេដាយរួមមានមេដាយមាស ១៧, មេដាយប្រាក់ ៧ និងមេដាយសំរឹទ្ធ ២២៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
