យោងតាមការស្ទង់មតិថ្មីមួយ បានបង្ហាញឲ្យដឹងថា ការគាំទ្រសម្រាប់រដ្ឋាភិបាលរបស់គណបក្សពលករឆ្វេងនិយមកណ្ដាលរបស់ប្រទេសអូស្ត្រាលី បានធ្លាក់ចុះ បន្ទាប់ពីរយៈពេលមួយសប្តាហ៍នៃការផ្សព្វផ្សាយព័ត៌មានសេដ្ឋកិច្ច ដែលមានស្ថានភាពមិនល្អ និងការមានភាពតានតឹងផ្នែកនយោបាយ ជុំវិញជនអន្តោប្រវេសន៍ ដោយការបង្ហាញនេះធ្វើឲ្យគណបក្សរបស់លោកធ្លាក់ដល់កម្រិតទាបបំផុត គិតចាប់តាំងខ្លួនឡើងកាន់អំណាច កាលពី ២ឆ្នាំមុន។

នៅក្នុងការស្ទង់មតិរបស់អង្គភាព Newspoll ចេញផ្សាយដោយសារព័ត៌មាន «The Australian» នៅថ្ងៃទី៩ ខែមិថុនា ៥០ភាគរយអ្នកបោះឆ្នោតអូស្ត្រាលីដែលត្រូវបានស្ទង់មតិ បាននិយាយថា ពួកគេគាំទ្ររដ្ឋាភិបាលពលករជាងពេញចិត្តលើគណបក្សផ្សេង ខណៈដែល ៥០ភាគរយទៀត បាននិយាយថា ពួកគេកំពុងងាកទៅរកក្រុមចម្រុះស្តាំនិយមកណ្តាល គឺគណបក្សជាតិសេរី (Liberal-National Coalition)។

នេះគឺជាលទ្ធផលស្ទង់មតិដ៏អាក្រក់បំផុត សម្រាប់លោក Albanese ចាប់តាំងពីខែវិច្ឆិកា ហើយទាបជាងកម្រិតនៃការគាំទ្រដ៏រឹងមាំ សម្រាប់រដ្ឋាភិបាលរបស់លោក ភ្លាមៗបន្ទាប់ពីគណបក្សបានជាប់ឆ្នោត នៅក្នុងខែឧសភា ឆ្នាំ២០២២។ ការពេញចិត្តសុទ្ធ ចំពោះលោកនាយករដ្ឋមន្ត្រីក៏បានធ្លាក់ចុះមកដល់កម្រិតដក៧ (-៧) ផងដែរ ដោយធ្លាក់ចុះពីការគាំទ្រសុទ្ធពីកម្រិតសូន្យ។

ប្រជាប្រិយភាពរបស់មេដឹកនាំគណបក្សប្រឆាំង លោក Peter Dutton កើនឡើងជាលំដាប់ ទោះបីជារូបលោកនៅតែតាមពីក្រោយលោក Albanese ជានាយករដ្ឋមន្ត្រី ដែលទទួលបានការពេញចិត្តជាងក៏ដោយ។

គួរបញ្ជាក់ថា អូស្ត្រាលីគ្រោងនឹងឆ្ពោះទៅកាន់ការបោះឆ្នោតក្នុងរយៈពេល ១២ខែទៀត។ ការធ្លាក់ចុះនៃការគាំទ្រនេះកើតឡើងបន្ទាប់ពីមាននូវសប្តាហ៍ដ៏លំបាកសម្រាប់រដ្ឋាភិបាលរបស់លោក Albanese ដោយទិន្នន័យថ្មី កាលពីសប្តាហ៍មុន បង្ហាញថា សេដ្ឋកិច្ចរបស់ប្រទេសអូស្ត្រាលី បានកើនឡើងត្រឹមតែ ០,១ភាគរយប៉ុណ្ណោះ ក្នុងរយៈពេល ៣ខែដំបូងនៃឆ្នាំ២០២៤ ដែលទាបជាងការរំពឹងទុករបស់អ្នកសេដ្ឋកិច្ច៕