អ្នកជំនាញអាកាសធាតុជាន់ខ្ពស់របស់រដ្ឋាភិបាល នៅថ្ងៃចន្ទ (ទី១០ ខែមិថុនា) នេះ បាននិយាយថា រលកកម្ដៅរបស់ប្រទេសឥណ្ឌា គឺមានរយៈពេលយូរបំផុតមិនធ្លាប់មាន ដែលបានវាយប្រហារប្រទេស ខណៈដែលលោក បានព្រមានថា ប្រជាជននឹងប្រឈមជាមួយសីតុណ្ហភាពក្ដៅកាន់តែខ្លាំងឡើងៗ។

គួរបញ្ជាក់ថា ផ្នែកខ្លះនៃភាគខាងជើងប្រទេសឥណ្ឌា ត្រូវបានប៉ះពាល់យ៉ាងខ្លាំងក្លាដោយរលកកម្ដៅ ចាប់តាំងពីពាក់កណ្តាលខែឧសភាមក ដោយសីតុណ្ហភាពឡើងខ្ពស់លើសពី ៤៥អង្សារសេ។

នៅក្នុងបទសម្ភាសន៍ជាមួយសារព័ត៌មាន Indian Express លោកវេជ្ជបណ្ឌិត Mrutyunjay Mohapatra ប្រធាននាយកដ្ឋានឧតុនិយមឥណ្ឌា (IMD) បានប្រាប់ថា៖ «នេះគឺជារយៈពេលដ៏យូរបំផុត ព្រោះវា (រលកកម្ដៅ) បានកើតមានប្រមាណជា ២៤ថ្ងៃ នៅក្នុងតំបន់ផ្សេងៗគ្នារបស់ប្រទេស»។

គេរំពឹងថា សីតុណ្ហភាពនឹងធ្លាក់ចុះ ខណៈភ្លៀងរដូវមូសុងប្រចាំឆ្នាំ ធ្វើដំណើរឆ្ពោះទៅភាគខាងជើង ក្នុងខែមិថុនា ប៉ុន្តែលោកវេជ្ជបណ្ឌិត Mohapatra បានព្រមានថា ស្ថានភាពកាន់តែអាក្រក់ឡើងៗ នឹងកើតមាន។ លោកបានបន្តថា៖ «រលកកម្ដៅនឹងកើតឡើងកាន់តែញឹកញាប់ រយៈពេលយូរ និងខ្លាំងក្លាជាងមុន ប្រសិនបើវិធានការត្រៀមទប់ទល់ ឬបង្ការ មិនត្រូវបានអនុវត្តនោះទេ»។

សូមបញ្ជាក់បន្ថែមថា ឥណ្ឌាគឺជាប្រទេសដែលបញ្ចេញឧស្ម័នផ្ទះកញ្ចក់ធំជាងគេទី៣ របស់ពិភពលោក ប៉ុន្តែបានប្តេជ្ញាចិត្ត ដើម្បីសម្រេចបាននូវសេដ្ឋកិច្ចនៃការបំភាយឧស្ម័នសូន្យត្រឹមឆ្នាំ២០៧០ ពោលគឺមានរយៈពេល ២ទសវត្សរ៍បន្ទាប់ពីប្រទេសលោកខាងលិចភាគច្រើនត្រូវបានធ្វើឲ្យមានលក្ខណៈជាឧស្សាហូបនីយកម្ម៕