មន្ទីរបញ្ចកោណ បានព្យាយាមដើម្បីលុបបំបាត់អ្វីដែលខ្លួនបាននិយាយថា ជា​របាយការណ៍​ប្រព័ន្ធ​ផ្សព្វផ្សាយ​សង្គមមិនពិត ថា អ៊ីស្រាអែលបាន​ប្រើប្រាស់​កំពង់​ផែ​បណ្តែត​ទឹក​របស់​សហរដ្ឋ​អាមេរិក​នៅ​តំបន់​ហ្កាហ្សា ក្នុងបេសកកម្មជួយសង្គ្រោះចំណាប់ខ្មាំង ខណៈអង្គការសហប្រជាជាតិ បាន​និយាយ​ថា ខ្លួននឹងពិនិត្យមើលសន្តិសុខឡើងវិញ មុនពេលបន្តការដឹកជញ្ជូនជំនួយពីកំពង់ផែ។ អ្នកនាំពាក្យមន្ទីរបញ្ចកោណ ឧត្តមសេនីយ ផាទ្រីក រ៉ៃឌ័រ(Patrick Ryder) បានឆ្លើយបកទៅវិញ លើការចោទប្រកាន់តាមប្រព័ន្ធផ្សព្វផ្សាយសង្គមមិនពិតមួយចំនួន ដោយបញ្ជាក់ថា កំពង់ផែ​មិន​ត្រូវ​បានប្រើប្រាស់ក្នុងអំឡុងពេលប្រតិបត្តិការយោធា​របស់អ៊ីស្រាអែល​កាល​ពីថ្ងៃសៅរ៍​ដើម្បី​ជួយ​សង្គ្រោះ​ចំណាប់ខ្មាំងបួននាក់ ដែលត្រូវបានឃុំខ្លួនដោយក្រុមហាម៉ាសនោះទេ។

លោក Ryder បានទទួលស្គាល់ថា មានប្រតិបត្តិការប្រើប្រាស់ឧទ្ធម្ភាគចក្ររបស់អ៊ីស្រាអែល នៅ​ជិត​កំពង់ផែ។ លោកនិយាយថា កំពង់ផែ សម្ភារៈ និងបុគ្គលិក​ទាំងអស់​ដែល​គាំទ្រ​កិច្ច​ខិតខំ​ប្រឹង​ប្រែង​មនុស្សធម៌ គ្មានអ្វីត្រូវជាប់ពាក់ព័ន្ធជាមួយប្រតិបត្តិការជួយសង្គ្រោះរបស់អ៊ីស្រាអែលទេ។ យោធា​សហរដ្ឋអាមេរិក បានបន្តរើចេញជំនួយនិងដឹកជញ្ជូន ប៉ុន្តែស្ថានភាព​ទឹក​សមុទ្រ​មិន​អំណោយ​ផល បានបញ្ឈប់សកម្មភាពកាលពីថ្ងៃអាទិត្យ និងថ្ងៃចន្ទ។ ប្រតិបត្តិការនេះ ត្រូវ​បាន​ផ្អាក​ជា​បណ្ដោះអាសន្នដើម្បីជួសជុលកំពង់ផែ បន្ទាប់ពីមានបាក់ខូចមួយផ្នែក។

ទោះ​ជា​យ៉ាងណា អង្គការសហប្រជាជាតិ នៅមិន​ទាន់​បាន​បន្ត​ការ​ដឹក​ជញ្ជូន​ជំនួយ​ពី​កំពង់​ផែ​ទៅ​កាន់​ឃ្លាំង​របស់កម្មវិធីស្បៀងអាហារពិភពលោករបស់អង្គការសហប្រជាជាតិ នៅឡើយ។ ក្រសួង​សុខាភិបាល តំបន់ហ្កាហ្សា បាននិយាយថា ប្រជាជនប៉ាឡេស្ទីន ២៧៤នាក់ ត្រូវ​បាន​សម្លាប់​ក្នុង​អំឡុង​ពេល​ប្រតិបត្តិការជួយសង្គ្រោះចំណាប់ខ្មាំងរបស់អ៊ីស្រាអែល។ អ្នកនាំពាក្យលោក Stephane Dujarric បាននិយាយថា ការចូលរួមរបស់​អង្គការ​សហ​ប្រជាជាតិ​នៅ​ក្នុង​ប្រតិបត្តិការ​នៅ​កំពង់ផែ​នឹងនៅតែផ្អាក រហូតដល់ការវាយតម្លៃហ្មត់ចត់អំពីស្ថានភាពសន្តិសុខត្រូវបានធ្វើឡើង ដើម្បី​ធានាបានសុវត្ថិភាពរបស់បុគ្គលិក និងដៃគូ។

ប្រធានា​ធិបតីសហរដ្ឋអាមេរិក លោក Joe Biden បានប្រកាសកាលពីខែមីនា អំពីផែន​ការ​ដាក់​កំពង់​ផែ​ សម្រាប់ការផ្តល់ជំនួយ ខណៈគ្រោះទុរ្ភិក្សបានកើតឡើងនៅក្នុងតំបន់ហ្កាហ្សា ជា​តំបន់​គ្រប់​គ្រង​ដោយក្រុមហាម៉ាស មានប្រជាជនចំនួន ២,៣ លាននាក់ ក្នុងអំឡុងពេល​សង្រ្គាម​រវា​ង​អ៊ីស្រាអែល និងក្រុមសកម្មប្រយុទ្ធប៉ាឡេស្ទីន៕