អធិការបតីអាល្លឺម៉ង់ លោក Olaf Scholz នៅថ្ងៃអង្គារ (ទី១១ ខែមិថុនា) នេះ បានជួបជុំក្រុមហ៊ុនឯកជន ដើម្បីជំរុញឲ្យពួកគេជួយស្ដារប្រទេសអ៊ុយក្រែនឡើងវិញ ខណៈដែលរូបលោកបានបើកសន្និសីទស្ដារឡើងវិញ នៅទីក្រុងប៊ែរឡាំង ដែលមានគោលបំណងកៀរគរការគាំទ្រអន្តរជាតិ ដើម្បីកសាងប្រទេសនេះឡើងវិញ ក្រោយសង្គ្រាម។

ដោយលើកឡើងពីការប៉ាន់ប្រមាណរបស់ធនាគារពិភព ដែលថា អ៊ុយក្រែនអាចត្រូវការ ៥០០ពាន់លានដុល្លារ ក្នុងរយៈពេល ១ទសវត្សរ៍ លោក Scholz បាននិយាយថា ក្រុមហ៊ុននានាត្រូវតែត្រូវបានបង្ហាញជូននូវស្ថានភាពអាជីវកម្ម ដើម្បីការវិនិយោគ និងលើកសរសើរអំពីសក្តានុពលរបស់អ៊ុយក្រែន នៅក្នុងវិស័យនានា ដែលរួមការកកើតឡើងវិញ បច្ចេកវិទ្យាព័ត៌មានវិទ្យា និងឱសថ។

ជាមួយគ្នានេះ លោក Scholz ក៏បាននិយាយផងដែរថា ប្រទេសអាល្លឺម៉ង់កំពុងបញ្ជូនប្រព័ន្ធការពារដែនអាកាស មីស៊ីល និងអាវុធបន្ថែមទៀត ដើម្បីជួយពង្រឹងដល់ការការពាររបស់ទីក្រុងគីវ ប្រឆាំងនឹងការវាយប្រហារយ៉ាងខ្លាំងក្លារបស់រុស្ស៊ីលើទីក្រុងនានា និងហេដ្ឋារចនាសម្ព័ន្ធសំខាន់ៗ ក្នុងរយៈពេលជាង ២ឆ្នាំ បន្ទាប់ពីរុស្ស៊ីបានបើកការលុកលុយពេញលេញ។

ទីក្រុងគីវ សង្ឃឹមថា សន្និសីទស្តារឡើងវិញនេះ នឹងពង្រឹងដល់សារតាំងរបស់ខ្លួន ក្នុងនាមជាសមាជិកនាពេលអនាគតរបស់សហភាពអឺរ៉ុប (EU) ដែលសមនឹងទទួលបានការបញ្ចូលបន្ថែមនូវហិរញ្ញប្បទានស្ដារឡើងវិញក្នុងចំនួនដ៏ច្រើន បើទោះបីជាកងកម្លាំងរុស្ស៊ី នៅតែបន្តរុលទៅមុខសន្សឹមៗ នៅភាគខាងកើតអ៊ុយក្រែនក៏ដោយ។

គួរបញ្ជាក់ថា សន្និសីទទីក្រុងប៊ែរឡាំងនេះ ត្រូវបានធ្វើឲ្យមានភាពរអាក់រអួលតិចតួច ក្នុងសប្តាហ៍នេះ ដោយសារការលាលែងពីតំណែងរបស់មន្ត្រីជាន់ខ្ពស់ផ្នែកស្ដារឡើងវិញរបស់អ៊ុយក្រែន និងជាអតីតសមាជិកសភាដ៏លេចធ្លោ ដែលបាននិយាយថា «ឧបសគ្គជាប្រព័ន្ធ» កំពុងធ្វើឲ្យការងាររបស់លោកមិនអាចមានប្រសិទ្ធភាពគ្រប់គ្រាន់៕