ការិយាល័យរបស់លោក To Lam បានឲ្យដឹងនៅក្នុងសេចក្តីថ្លែងការណ៍មួយថា លោកប្រធានាធិបតីវៀតណាមថ្មីរូបនេះ នាថ្ងៃអង្គារ (ទី១១ ខែមិថុនា) នេះ បានប្រាប់ឯកអគ្គរដ្ឋទូតចិនប្រចាំនៅទីក្រុងហាណូយ គឺលោក Xiong Bo ថា ពិតជាមានសារៈសំខាន់ណាស់ដែលជម្លោះដែនសមុទ្រ ត្រូវបានដោះស្រាយដោយល្អប្រសើរ ហើយផលប្រយោជន៍របស់ប្រទេសនីមួយៗ ត្រូវបានគោរព។
ទោះបីជាប្រទេសចិន គឺជាដៃគូពាណិជ្ជកម្មដ៏ធំបំផុតរបស់វៀតណាមក្ដី ប៉ុន្តែប្រទេសជិតខាងទាំង២ ដែលគ្រប់គ្រងដោយលទ្ធិកុម្មុយនីស្តដូចគ្នា បានជាប់ពាក់ព័ន្ធនឹងជម្លោះដែនសមុទ្រយូរឆ្នាំ នៅក្នុងសមុទ្រចិនខាងត្បូង។
សេចក្តីថ្លែងការណ៍បានឲ្យដឹងថា លោក Lam បាននិយាយនៅក្នុងកិច្ចប្រជុំនាទីក្រុងហាណូយថា ប្រទេសនានា ចាំបាច់ត្រូវគោរពផលប្រយោជន៍ស្របច្បាប់របស់គ្នាទៅវិញទៅមក។ នៅក្នុងកិច្ចប្រជុំនោះ លោក Lam បានប្រាប់ទៀតថា ភាគីទាំង២ ត្រូវតែ «ស្វែងរកយ៉ាងសកម្មនូវដំណោះស្រាយដែលអាចទទួលយកបាន ដោយស្របតាមច្បាប់អន្តរជាតិ»។
គួរបញ្ជាក់ថា កាលពីថ្ងៃព្រហស្បតិ៍សប្ដាហ៍កន្លងទៅ ក្រសួងការបរទេសវៀតណាម បានលើកឡើងថា ខ្លួនមានការព្រួយបារម្ភយ៉ាងខ្លាំង ចំពោះវត្តមាននាវាអង្កេតរបស់ចិន នៅក្នុងតំបន់សេដ្ឋកិច្ចផ្តាច់មុខរបស់ប្រទេសវៀតណាម។
ក្នុងកិច្ចប្រជុំ នាថ្ងៃអង្គារនេះ លោក Lam បាននិយាយថា ការអភិវឌ្ឍចំណងមិត្តភាព និងកិច្ចសហប្រតិបត្តិការឲ្យកាន់តែល្អប្រសើរជាមួយប្រទេសចិន គឺជាជម្រើសយុទ្ធសាស្ត្ររបស់វៀតណាម និងជាអាទិភាព ក្នុងគោលនយោបាយការបរទេសរបស់ខ្លួន៕