សត្វចិញ្ចឹម និងត្រីតាំងលម្អជាង ១.០០០ក្បាល ត្រូវបានរាយការណ៍ថា ងាប់ បន្ទាប់ពីអណ្ដាតភ្លើង បានឆាបឆេះឡើង នៅក្នុងផ្សារ Chatuchak នាទីក្រុងបាងកក ប្រទេសថៃ នៅព្រឹកព្រលឹមថ្ងៃអង្គារ (ទី១១ ខែមិថុនា) នេះ។
អគ្គិភ័យនេះបានផ្ដើមមានឡើងនៅវេលាម៉ោង ៤:៣០នាទីព្រឹក ម៉ោងក្នុងស្រុក ដោយបានឆេះតូបទាំង១១៨ នៅក្នុងផ្សារ Sri Somrat ដែលត្រូវបានគេចាត់ទុកថា ជាតំបន់នៃសត្វចិញ្ចឹមរបស់ផ្សារ Chatuchak។
សត្វដែលរងគ្រោះដោយចំហេះនោះ រួមមានសុនខ (ឆ្កែ) ឆ្មា ទន្សាយ ពស់ បក្សី ត្រីក្រឹម និងមាន់។ តែយ៉ាងណា ក្នុងហេតុការណ៍នោះ មិនមានសេចក្ដីរាយការណ៍ថា មានមនុស្សរងរបួសនោះទេ ។
បន្ទាប់ពីអគ្គិភ័យនោះឆាបឆេះឡើង គេឃើញឡានទឹកជាង ១០គ្រឿង ត្រូវបានពង្រាយនៅកន្លែងកើតហេតុ។ ក្រុមអ្នកពន្លត់អគ្គិភ័យបានចំណាយពេលប្រហែល ១ម៉ោង ដើម្បីពន្លត់អណ្តាតភ្លើង។ ការស៊ើបអង្កេតកំពុងដំណើរការ ដើម្បីកំណត់ពីមូលហេតុដែលនាំឲ្យមានចំហេះនេះ៕