កងទ័ពជើងទឹកកូឡុំប៊ី បានបើកស្កាត់ទូក ២គ្រឿង ផ្ទុកសារធាតុកូកាអ៊ីនទម្ងន់ជិត ៥តោន អំឡុងពេលប្រតិបត្តិការតាមសមុទ្រ ។

នៅក្នុងប្រតិបត្តិការរួមគ្នា កងទ័ពជើងទឹក និងកងទ័ពអាកាស បានបើកដេញទូក ២គ្រឿងដែលបើកនៅជិតតំបន់ឆ្នេរសមុទ្រប៉ាស៊ីហ្វិក ស្ថិតក្នុងតំបន់ Narino នៅជិតព្រំដែនប្រទេសអេក្វាឌ័រ ។

ក្រុមអាជ្ញាធរ និយាយថា ដំបូងពួកគេចាប់បានទូកមួយគ្រឿងផ្ទុកសារធាតុកូកាអ៊ីនទម្ងន់ ២,៧តោន ។

ពួកគេបន្តថា ពួកគេចាប់ខ្លួនជនសង្ស័យ ៣នាក់ ដែលមានសញ្ជាតិកូឡុំប៊ី និងបាននាំកញ្ចប់ផ្ទុកសារធាតុកូកាអ៊ីន ឡើងលើទូកកងទ័ពជើងទឹក ហើយនិងបានពន្លិចទូកឧក្រិដ្ឋជនចោល ។

ប៉ុន្មានម៉ោងក្រោយមក ប្រតិបត្តិការស្រដៀងគ្នា បានធ្វើឡើងជាមួយទូកមួយគ្រឿងទៀត ដែលផ្ទុកសារធាតុកូកាអ៊ីនទម្ងន់ ២,២តោន ។

ក្រុមអាជ្ញាធរ និយាយថា នៅក្នុងប្រតិបត្តិការលើកនេះ ពួកគេចាប់ខ្លួនបានជនជាតិកូឡុំប៊ី ២នាក់ និងជនជាតិអេក្វាឌ័រ ម្នាក់ ៕