ប្រធានរដ្ឋអាជ្ញាតុលាការព្រហ្មទណ្ឌអន្តរជាតិ(ICC) នឹងបើកការស៊ើបអង្កេតបន្ទាន់លើការចោទប្រកាន់ពីឧក្រិដ្ឋកម្មសង្រ្គាម និងឧក្រិដ្ឋកម្មលើមនុស្សនៅទីក្រុង al-Fashir តំបន់ Darfur ដែលបានក្លាយជាខ្សែត្រៀមថ្មីរវាងកងទ័ពស៊ូដង់ និងកងកម្លាំងគាំទ្ររហ័ស(RSF) ។

នៅក្នុងសេចក្តីថ្លែងការណ៍ជាវីដេអូ បញ្ចេញនៅថ្ងៃអង្គារនេះ លោករដ្ឋអាជ្ញា Karim Khan និយាយថា ICC មាននូវការស៊ើបអង្កេតដ៏សកម្មចំពោះឧក្រិដ្ឋកម្មដ៏ឃោឃៅត្រូវបានប្រព្រឹត្តនាពេលបច្ចុប្បន្ននៅតំបន់ Darfur ។

ក្រុមស៊ើបអង្កេតរបស់លោក បានឃើញការចោទប្រកាន់នូវអ្វីដែលទំនងជាការវាយប្រហារផ្តើមចេញពីជនជាតិ លើជនស៊ីវិល ករណីចាប់រំលោភសេពសន្ថវៈទ្រង់ទ្រាយធំ និងការវាយប្រហារលើមន្ទីរពេទ្យ ។

លោក Khan បានអំពាវនាវឲ្យអ្នករាល់គ្នាដែលមានភស្តុតាង វីដេអូ ឬខ្សែអាត់សំឡេង មេត្តាផ្តល់ជូនការិយាល័យរបស់លោក ។

ទីក្រុង Al-Fashir ស្ថិតក្នុងតំបន់ Darfur នៅភាគពាយ័ព្យប្រទេសស៊ូដង់ មានពលរដ្ឋរស់នៅ និងជម្លៀសខ្លួនជាង ១,៨លាននាក់ និងជាខ្សែត្រៀមចុងក្រោយគេនៅក្នុងសង្រ្គាមរវាងកងទ័ពស៊ូដង់ និងកងកម្លាំង RSF ដែលបានចាប់ផ្តើមកាលពីខែមេសា ឆ្នាំ ២០២៣ ៕