ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានជួបពិភាក្សា​ការងារ​ជាមួយ​ឯកឧត្តម Gilbert F. Houngbo អគ្គនាយកអង្គការអន្តរជាតិខាងការងារ (ILO) កាលពី​ថ្ងៃទី១១ខែមិថុនា​ម្សិលមិញ ម៉ោង៥ល្ងាចម៉ោងនៅប្រទេសស្វីស។ ជាជំនួប​ដែលឯកឧត្តម​រដ្ឋ​មន្ត្រី​អញ្ជើញ​ចូល​រួមកិច្ចប្រជុំប្រចាំឆ្នាំរបស់អង្គការអន្តរជាតិខាងការងារ(ILO)។

ក្នុងជំនួបនោះ ឯកឧត្តមរដ្ឋមន្ត្រី បានលើកឡើងពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា​ក្នុង​ការ​បន្តអភិវឌ្ឍសង្គមជាតិដើម្បីបន្តផ្តល់ការងារសមរម្យជាមួយនឹងរបបសន្តិសុខសង្គម និង​ជំនាញ​ជាក់​លាក់ច្បាស់លាស់ជូនប្រជាពលរដ្ឋ។ បន្ថែមពីនេះ ឯកឧត្តមរដ្ឋមន្ត្រី ក៏បាន​គូស​បញ្ជាក់​ពី​កិច្ចខិតខំ​ប្រឹងប្រែង​របស់កម្ពុជាបន្ថែមទៀតដើម្បីឱ្យបរិយាកាស​ការងារ​ក្នុង​ទំនាក់​ទំនង​វិជ្ជាជីវៈនៅកម្ពុជាកាន់តែប្រសើរឡើងជាលំដាប់។

ជាមួយគ្នានេះ ឯកឧត្តមអគ្គនាយក ក៏បានវាយតម្លៃខ្ពស់នៃភាពរីកចម្រើនជាលំដា​ប់​របស់​កម្ពុជា​ក្នុង​រយៈពេល១៥ឆ្នាំមកនេះដែលប្រទេសកម្ពុជាសម្រេចបានដើម្បីវឌ្ឍនភាព និងវិបុលភាព​ក្នុង​វិស័យ​វាយនភណ្ឌ និងសង្គមទាំងមូលដែលកំពុងទទួលបានផលភាគចេញពីការអភិវឌ្ឍ និង​វឌ្ឍនភាពនៃសង្គមសេដ្ឋកិច្ចរបស់កម្ពុជា។

ទន្ទឹមនឹងនេះ ឯកឧត្តមរដ្ឋមន្ត្រី បានបញ្ជាក់ពីភាពចាំបាច់ដែលមិនអាចខ្វះបាន​នៃវត្តមានរបស់​អង្គការ​អន្តរជាតិ​ខាង​ការងារ​(ILO)​ក្នុង​ការ​បន្ត​ជួយ​ជ្រោម​ជ្រែង​កម្ពុជា​បន្ថែម​ទៀត​ក្នុង​នាម​ជា​ដៃ​គូ​សន្ទនា​ដើម្បីជំរុញយន្តការសន្ទនាសង្គម ភាពសុខដុមនីយកម្មនៅកន្លែងការងារ ក៏ដូចជាការ​ពង្រឹង​ផលិតភាពក្នុងសង្វាក់ផលិតកម្មរបស់កម្ពុជាផងដែរ៕