រដ្ឋាភិបាលចិន បាននិយាយនៅថ្ងៃពុធ (១២ មិថុនា) នេះថា បុរសជនជាតិចិនម្នាក់ដែលត្រូវបានចាប់ខ្លួននៅជិតទីក្រុងតៃប៉ិ បន្ទាប់ពីបានឆ្លងកាត់ច្រកសមុទ្រតៃវ៉ាន់ដោយប្រើទូកល្បឿនលឿន បានធ្វើសកម្មភាពនោះដោយខ្លួនឯង ហើយថាកោះតៃវ៉ាន់ មិនគួរមានការសង្ស័យ ឬបារម្ភអ្វីឡើយ ក្នុងករណីដែលបានធ្វើឱ្យមានការភ្ញាក់ផ្អើលដល់ក្រុមមន្ត្រីសន្តិសុខតៃវ៉ាន់។

ឆ្មាំល្បាតឆ្នេររបស់តៃវ៉ាន់ បានចាប់ខ្លួនបុរសនោះកាលពីថ្ងៃអាទិត្យ នៅក្នុងតំបន់មាត់សមុទ្រ តានសួយ (Tamsui) បន្ទាប់ពីទូករបស់គេបានចូលទៅក្នុងផ្លូវទឹកដែលនាំទៅដល់ទីក្រុងតៃប៉ិ ស្របពេលមានភាពតានតឹងកំពុងបន្តរវាងកោះតៃវ៉ាន់ និងចិន។ តៃវ៉ាន់និយាយថា បុរសនោះជាអតីតកាពីទែនទ័ពជើងទឹកចិន ដែលអាចនឹងកំពុងស៊ើបអង្កេត និងសាកល្បងលើប្រព័ន្ធការពារកោះ។

ថ្លែងនៅក្នុងសន្និសីទសារព័ត៌មាននៅទីក្រុងប៉េកាំង លោក ឈិន ពិនហួរ (Chen Binhua) អ្នកនាំពាក្យការិយាល័យកិច្ចការតៃវ៉ាន់របស់ប្រទេសចិនបាននិយាយថា អ្វីដែលបុរសនោះបានធ្វើគឺ «សកម្មភាពផ្ទាល់ខ្លួនរបស់គេសុទ្ធសាធ ហើយអាជ្ញាធរតៃវ៉ាន់ មិនចាំបាច់ចោទទាហានណាម្នាក់ថាកំពុងធ្វើឧបាយកលនយោបាយទេ ខណៈខ្លួនកំពុងធ្វើពុតជាធ្វើសកម្មភាពដោយម៉ឹងម៉ាត់»។

លោក ឈិន បានបន្ថែមថា បុរសនោះនឹងត្រូវទទួលទោស នៅពេលដែលលោកត្រឡប់ទៅប្រទេសចិនវិញ ដោយមិនបានផ្តល់ព័ត៌មានលម្អិត។ កោះតៃវ៉ាន់ ដែលមិនបានពិនិត្យឃើញទូករបស់បុរសនោះរហូតដល់ចូលជិតឆ្នេរ មិនបានបង្ហាញពីពេលវេលាណា ឬថាតើខ្លួននឹងបញ្ជូនបុរសនោះទៅវិញ ឬអត់ទេ ដោយនិយាយថា អាជ្ញាធរផ្លូវច្បាប់កំពុងស៊ើបអង្កេតនៅឡើយ៕