សកម្មជន និងអ្នកនេសាទហ្វីលីពីនរាប់រយនាក់ បានប្រមូលផ្តុំគ្នានៅខាងក្រៅស្ថានកុងស៊ុលចិន នៅទីក្រុងម៉ានីល កាលពីថ្ងៃអង្គារ (១១ មិថុនា) ដើម្បីតវ៉ាប្រឆាំងនឹងសកម្មភាពដែនសមុទ្ររបស់ទីក្រុងប៉េកាំង។ ពួកគេបានទាមទារឱ្យចិន ដកខ្លួនចេញពីដែនទឹកជម្លោះនៅសមុទ្រចិនខាងត្បូង ដែលភាពតានតឹងកាន់តែខ្លាំងឡើងរវាងទីក្រុងម៉ានីល និងទីក្រុងប៉េកាំង កំពុងប៉ះពាល់ដល់ជីវិតអ្នកនេសាទហ្វីលីពីន។

ក្រុមបាតុករ បានចេញតវ៉ាតាមដងផ្លូវនៅមុនថ្ងៃបុណ្យឯករាជ្យរបស់ហ្វីលីពីន។ ក្នុងចំណោមនោះ មានអ្នកនេសាទជាច្រើនដែលតវ៉ាដោយសារគេមិនអាចបន្តការងារបានទេ ព្រោះចិនបង្កើនវត្តមានរបស់ខ្លួននៅសមុទ្រចិនខាងត្បូង។ អ្នកនេសាទម្នាក់និយាយថា កូនរបស់ខ្លួនត្រូវឈប់រៀន ដោយសារបាត់បង់ប្រភពចំណូល។

បាតុករដែលជានិស្សិតស្រីម្នាក់បាននិយាយថា ប្រជាជនហ្វីលីពីនត្រូវតែបង្ហាញច្បាស់ថាសមុទ្រហ្វីលីពីនខាងលិចជារបស់ពួកគេ ហើយចិន មិនគួរយកដែនទឹកនោះពីអ្នកនេសាទឡើយ។

ទីក្រុងប៉េកាំង កំពុងទាមទារស្ទើរតែទាំងស្រុងនូវសមុទ្រចិនខាងត្បូង រួមទាំងតំបន់ថ្មប៉ប្រះទឹក ស្កាបូរ៉ូ ស្ហូល (Scarborough Shoal) ប៉ុន្តែទីក្រុងម៉ានីលនិយាយថា ថ្មប៉ប្រះទឹកនោះស្ថិតនៅក្នុងតំបន់សេដ្ឋកិច្ចផ្តាច់មុខរបស់ខ្លួន និងជាតំបន់នេសាទបែបប្រពៃណីសម្រាប់អ្នកនេសាទហ្វីលីពីន៕