រដ្ឋមន្ត្រីការបរទេសអាមេរិក លោក អង់តូនី ប៊ីលនខិន (Antony Blinken) បានប្រកាសថា ទឹកប្រាក់ចំនួន ៤០៤ លានដុល្លារជាជំនួយថ្មី ដល់ប៉ាឡេស្ទីន ខណៈពេលដែលលោក ចូលរួមក្នុងសន្និសីទជំនួយមនុស្សធម៌សម្រាប់តំបន់ហ្កាហ្សាស្ទ្រីប នៅប្រទេសហ្ស៊កដានី។

លោក ប្ល៊ីនខិន បាននិយាយថា៖«ថ្ងៃនេះ ខ្ញុំបានប្រកាសបន្ថែមទីកប្រាក់ចំនួន ៤០៤ លានដុល្លារជាជំនួយថ្មីដល់ប៉ាឡេស្ទីន បន្ថែមពីលើ [១,៨ ពាន់លានដុល្លារ] ជាជំនួយអភិវឌ្ឍន៍ សេដ្ឋកិច្ច និងមនុស្សធម៌ ដែលសហរដ្ឋអាមេរិក បានផ្តល់ឲ្យ តាំងពីឆ្នាំ ២០២១»។

«សូមយើងធ្វើការរួមគ្នា ដើម្បីធានាថា ជំនួយកាន់តែច្រើនចូលទៅក្នុងតំបន់ហ្កាហ្សា ហើយនៅពេលដែលវាទៅដល់តំបន់ហ្កាហ្សា ទៅដល់មនុស្សដែលត្រូវការវាច្រើនបំផុត តាមផ្លូវគោក ផ្លូវអាកាស និងតាមផ្លូវ        សមុទ្រ»។

លោកបានជំរុញប្រទេសទាំងអស់ដែលចូលរួមផ្តល់ជំនួយបន្ថែមទៀត ខណៈដែល«ការអំពាវនាវរបស់អង្គការសហប្រជាជាតិបច្ចុប្បន្ន មានតែមួយភាគបីប៉ុណ្ណោះ ត្រូវបានផ្តល់មូលនិធិ»។

លោក បាននិយាយថា ក្នុងរយៈពេលប៉ុន្មានខែថ្មីៗនេះ អ៊ីស្រាអែល បានចាត់វិធានការ ដើម្បីដោះស្រាយឧបសគ្គ ក្នុងការផ្តល់ជំនួយទៅកាន់តំបន់ហ្កាហ្សា ប៉ុន្តែថា «ខ្លួនអាចធ្វើបាន និងត្រូវតែធ្វើបន្ថែមទៀត»។

លោក បានអំពាវនាវឲ្យអ៊ីស្រាអែលពន្លឿនការត្រួតពិនិត្យរថយន្តជំនួយ កាត់បន្ថយបញ្ជីរាយនាមទំនិញហាមឃាត់ បង្កើនថ្នាំសង្គ្រោះអាយុជីវិត ជួសជុលប្រព័ន្ធទឹក និងអនាម័យ ព្រមទាំងកាត់បន្ថយការស្លាប់ ជនស៊ីវិលផងដែរ។