នគរបាលឈីលី និងក្រុមជួយសង្គ្រោះ បានជួយអ្នកស្រុកដាច់ស្រយាលឲ្យជម្លៀសចេញពីតំបន់លិចទឹក កាលពីថ្ងៃអង្គារ (១១ មិថុនា) ខណៈដែលភាគខាងត្បូងប្រទេសឈីលី បានជួបនឹងការលំបាកដោយសារភ្លៀងធ្លាក់ខ្លាំង។

នគរបាលត្រូវបានដាក់ពង្រាយនៅទីក្រុង Arauco តំបន់ Biobio បន្ទាប់ពីសេវាបង្ការគ្រោះមហន្តរាយ Senapred បានបញ្ជាឲ្យជម្លៀសប្រជាជនពីតំបន់ដែលមានទឹកជំនន់ ដោយសារកម្រិតទឹកទន្លេ Pichilo និង Carampangue ឡើងខ្ពស់ខ្លាំង។ យោងតាមប្រព័ន្ធផ្សព្វផ្សាយក្នុងស្រុក បានឲ្យដឹងថា ផ្ទះចំនួន ៤០០ខ្នង ត្រូវបានជន់លិច។

បញ្ជានេះបានធ្វើតាមការជូនដំណឹងពណ៌ក្រហម សម្រាប់ក្រុង Arauco។ ក្រោយមក សេវា Senapred បានចេញការជូនដំណឹងពណ៌ក្រហម សម្រាប់តំបន់ Biobio ទាំងមូល។

យោងតាមទីភ្នាក់ងារឧតុនិយមរបស់រដ្ឋាភិបាល Meteochile បានឲ្យដឹងថា ភ្លៀងធ្លាក់ពីមធ្យមទៅច្រើន ត្រូវបានគេរំពឹងថា នឹងកើតមាននៅក្នុងតំបន់នេះ កាលពីថ្ងៃអង្គារ៕