ភ្នំពេញ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងថា រាជរដ្ឋាភិបាលកម្ពុជាអាណត្តិថ្មីនេះ កំពុងបន្តខិតខំកសាងរដ្ឋកម្ពុជា ឲ្យកាន់តែមានភាពទំនើប ហើយសូមស្នើដល់អ្នកពាក់ព័ន្ធទាំងអស់ ចូលរួមអនុវត្តន៍នូវការងារនេះ ។

ក្នុងពិធីទទួលស្វាគមន៍ និងជួបសំណេះសំណាលជាមួយសិក្ខាកាមជាន់ខ្ពស់ វគ្គភាពជាអ្នកដឹកនាំ និងនវានុវត្តន៍ជំនាន់ទី៦ នៃសាលាភូមិន្ទរដ្ឋបាល ដែលមកបំពេញទស្សនកិច្ចសិក្សាស្វែងយល់អំពីការអនុវត្តការងារច្រកចេញចូលតែមួយ និងលើវិស័យជំនាញរបស់ក្រសួង នៅថ្ងៃទី១៣ ខែមិថុនា ឆ្នាំ២០២៤ ឯកឧត្តមឧបនាយករដ្ឋមន្ត្រី បានចាត់ទុកទស្សនកិច្ចសិក្សានេះ ជាពេលវេលាសំខាន់មួយក្នុងប្រវត្តិសាស្ត្ររបស់កម្ពុជា ពីព្រោះរាជរដ្ឋាភិបាលកម្ពុជា អាណត្តិទី៧ បានដាក់ចេញនូវទិសដៅក្នុងការកសាងរដ្ឋទំនើប ហើយក្រសួងបាននិងកំពុងធ្វើសកម្មភាពជាច្រើន ដើម្បីឆ្លើយតបទៅនឹងទស្សនវិស័យរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ពាក់ព័ន្ធនឹងវិស័យរៀបចំដែនដី នគរូបនីយកម្ម និងសំណង់ ។

ជាមួយនេះ ឯកឧត្តម បានលើកឡើងអំពីសច្ចភាពប្រវត្តិសាស្ត្រ ដោយកម្ពុជាធ្លាប់បានឆ្លងកាត់ជាច្រើនដំណាក់កាល នូវការផ្លាស់ប្ដូររបបគ្រប់គ្រង តាមសម័យកាលនីមួយៗ រហូតមកដល់បច្ចុប្បន្ននេះ ហើយក្នុងនីតិកាលទី៧នេះ គឺជាលើកទីមួយក្នុងប្រវត្តិសាស្ត្រកម្ពុជាដែលការផ្ទេរភារកិច្ចក្នុងការគ្រប់គ្រងរដ្ឋត្រូវបានធ្វើឡើងដោយរលូន ។

ឯកឧត្តម សាយ សំអាល់ បានបន្តថា រាជរដ្ឋាភិបាលបាននិងកំពុងកសាងរដ្ឋទំនើបប្រកបដោយភាពរឹងមាំ ឆ្លាតវៃ រស់រវើក និងច្នៃប្រឌិត ដោយមានយុទ្ធសាស្រ្តបញ្ចកោណ ដំណាក់កាលទី១ គោលនយោបាយទាំង៦ និងវិធានគន្លឹះទាំង៥ ជាផែនទីឯកភាពនៃចក្ខុវិស័យដ៏វែងឆ្ងាយ ដើម្បីកម្ពុជាមានភាពម្ចាស់ការ រក្សាបានឯករាជ្យក្នុងនាមរដ្ឋអធិបតេយ្យ និងដឹកនាំនាវាកម្ពុជាឈានឆ្ពោះទៅកាន់វឌ្ឍនភាព និងវិបុលភាព ។

ឯកឧត្តមឧបនាយករដ្ឋមន្ត្រី បានបន្ថែមថា សម្ដេចធិបតី បានដាក់ចេញនូវវិធានសំខាន់ៗចំនួន៣ គឺធនធានមនុស្ស សមត្ថភាពស្ថាប័ន និងការលើកទឹកចិត្ត ហើយអ្វីដែលសម្ដេចធិបតីចង់បាន គឺការកសាងរដ្ឋទំនើប រៀបចំស្រុកទេសឱ្យបានល្អប្រសើរ ដើម្បីរក្សាអាយុជីវិតរបស់កម្ពុជា បន្តជំនាន់ទៅមុខទៀត ដោយត្រូវគិតគូរឱ្យចំទិសដៅ និងធ្វើឱ្យបានត្រឹមត្រូវឆ្ពោះទៅមុខ មិនត្រូវខ្ជះខ្ជាយពេលវេលា និងធនធាន ហើយមិនត្រូវត្រលប់ក្រោយឡើយ ។ 

រដ្ឋមន្ត្រីក្រសួងរៀបចំដែនដី បានបញ្ជាក់ថា កិច្ចការដែលក្រសួងរៀបចំដែនដី នគរូបនីយកម្ម និងសំណង់ បានអនុវត្តនាពេលនេះ គឺដើម្បីចូលរួមរៀបចំប្រទេសជាតិឆ្លើយតបទៅនឹងចក្ខុវិស័យរបស់ប្រមុខរាជរដ្ឋាភិបាល ដោយបន្តនិរន្តរភាពពីអាណត្តិមុន និងធ្វើដំណើរឆ្ពោះទៅមុខ ជ្រោងទង់សាមគ្គីឯកភាពផ្ទៃក្នុង កសាងពូនជ្រុំរដ្ឋបាលសាធារណៈទំនើប ដោយគ្រប់គ្រងទាំងធនធានមនុស្ស ស្ថាប័ន និងហិរញ្ញវត្ថុសាធារណៈ និងបណ្ដុះមនសិការមន្ត្រីរាជការស៊ីវិល ផ្ដល់សេវាសាធារណៈ ជូនប្រជាពលរដ្ឋឱ្យបានល្អប្រសើរ ចុះបញ្ជីដីធ្លីបង្ហើយ និងបញ្ចប់វិវាទដីធ្លីនៅទូទាំងប្រទេស ៕ អត្ថបទ ៖ បាន សុខរិទ្ធិ