ក្រសួងការបរទេសរបស់ទីក្រុងសេអ៊ូល បាននិយាយនៅថ្ងៃសុក្រ (១៤ មិថុនា) នេះថា មន្ត្រីជាន់ខ្ពស់នៃកូរ៉េខាងត្បូង និងសហរដ្ឋអាមេរិក បានធ្វើការពិភាក្សាតាមទូរស័ព្ទបន្ទាន់មួយ ជុំវិញលទ្ធភាពនៃដំណើរទស្សនកិច្ចដោយប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ទៅកាន់កូរ៉េខាងជើង។

ក្រសួងបាននិយាយថា អនុរដ្ឋមន្ត្រីការបរទេសកូរ៉េខាងត្បូង លោក គីម ហុងខ្យុន (Kim Hong-kyun) នៅក្នុងការសន្ទនាតាមទូរស័ព្ទជាមួយអនុរដ្ឋមន្ត្រីការបរទេសអាមេរិក លោក ឃឺត ខេមប៊ែល (Kurt Campbell) បាននិយាយថា ដំណើរទស្សនកិច្ចរបស់លោក ពូទីន មិនគួរបណ្តាលឱ្យមានកិច្ចសហប្រតិបត្តិការយោធាកាន់តែស៊ីជម្រៅរវាងទីក្រុងព្យុងយ៉ាង និងទីក្រុងមូស្គូ ដែលរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិនោះទេ។

ដោយបញ្ជាក់ឡើងវិញនូវកង្វល់របស់សម្ព័ន្ធមិត្តទាំងពីរ លោក គីម និងលោក ខេមប៊ែល បានសន្យាបន្តកិច្ចសហប្រតិបត្តិការដើម្បីដោះស្រាយអស្ថិរភាពក្នុងតំបន់ និងបញ្ហាប្រឈមនានាដែលបណ្តាលមកពីដំណើរទស្សនកិច្ចនោះ។ កាលពីថ្ងៃពុធ មន្ត្រីជាន់ខ្ពស់នៅការិយាល័យប្រធានាធិបតីនៃទីក្រុងសេអ៊ូល បាននិយាយថា លោក ពូទីន ត្រូវបានគេរំពឹងថានឹងធ្វើទស្សនកិច្ចនៅកូរ៉េខាងជើង «នៅក្នុងប៉ុន្មានថ្ងៃខាងមុខនេះ»។ សារព័ត៌មាន វ៉េដូម៉ូស្ទី (Vedomosti) របស់រុស្ស៊ី កាលពីថ្ងៃចន្ទបានរាយការណ៍ថា លោក ពូទីន នឹងទៅបំពេញទស្សនកិច្ចនៅកូរ៉េខាងជើង និងវៀតណាមក្នុងប៉ុន្មានសប្តាហ៍ខាងមុខ។

គេហទំព័រ NK PRO ដែលមានមូលដ្ឋាននៅទីក្រុងសេអ៊ូល បានរាយការណ៍នៅសប្តាហ៍នេះដោយដកស្រង់រូបភាពផ្កាយរណបពាណិជ្ជកម្មថា យន្តហោះស៊ីវិលត្រូវបានគេយកចេញពីអាកាសយានដ្ឋានក្រុងព្យុងយ៉ាង ហើយមានសញ្ញានៃការត្រៀមរៀបចំសម្រាប់លទ្ធភាពនៃការដង្ហែក្បួននៅទីលានចតុរង្គ គីម អ៊ីលស៊ុង (Kim Il Sung) នៃរដ្ឋធានីរបស់ប្រទេសផ្ដាច់ខ្លួនមួយនេះ៕