សហរដ្ឋអាមេរិក និងអូស្ត្រាលី នៅថ្ងៃសុក្រ (ទី១៤ ខែមិថុនា) បានសម្តែងការព្រួយបារម្ភ ជុំវិញការយកច្បាប់សន្តិសុខជាតិជាសំអាងរបស់ទីក្រុងហុងកុង ដើម្បីលុបចោលលិខិតឆ្លងដែនរបស់សកម្មជនប្រជាធិបតេយ្យចំនួន ៦នាក់ ដោយការលើកឡើងពីកង្វល់នេះបានបន្ថែមកាន់តែខ្លាំងឡើងដល់ការថ្កោលទោសរបស់លោកខាងលិច។

សូមបញ្ជាក់ថា ទីក្រុង ដែលជាមជ្ឈមណ្ឌលហិរញ្ញវត្ថុរបស់ប្រទេសចិនមួយនេះ កាលពីខែមីនា បានអនុម័តច្បាប់សន្តិសុខ ដែលត្រូវបានគេស្គាល់ជាទូទៅថា មាត្រា 23 ពោលគឺជាច្បាប់ ដែលបានពង្រីកបន្ថែមនូវអំណាចរបស់រដ្ឋបាលលើសពីអ្វីដែលបានផ្តល់ឲ្យដោយច្បាប់ ដែលទីក្រុងប៉េកាំងបានដាក់ចេញក្នុងឆ្នាំ២០២០ ដើម្បីបង្ក្រាបការជំទាស់តវ៉ា។

ហើយកាលពីថ្ងៃទី១២ ខែមិថុនា ទីក្រុងហុងកុងបានលុបចោលលិខិតឆ្លងដែនរបស់សកម្មជនចំនួន ៦រូបដែលបានភៀសខ្លួនទៅកាន់ប្រទេសអង់គ្លេស ដោយលើកឡើងពីច្បាប់ថ្មីជាមូលដ្ឋាន ដោយនិយាយថា ពួកគេជា «ឧក្រិដ្ឋជនដែលត្រូវការខ្លួនដោយសារសកម្មភាពខុសច្បាប់» ដែលបន្តបង្កគ្រោះថ្នាក់ដល់សន្តិសុខជាតិ។

សហរដ្ឋអាមេរិក នៅថ្ងៃទី១៤ ខែមិថុនានេះ បានអំពាវនាវឲ្យមន្ត្រីហុងកុង «បញ្ឈប់ជាបន្ទាន់នូវកិច្ចខិតខំប្រឹងប្រែងរបស់ពួកគេ ដើម្បីបំភិតបំភ័យ និងបំបិទមាត់អ្នកប្រឆាំង»។ ចំណែកប្រទេសអូស្ត្រាលីក៏បាននិយាយផងដែរថា ខ្លួនមានការព្រួយបារម្ភ ចំពោះការបាត់បង់សិទ្ធិ និងសេរីភាព ដោយបន្ថែមថា ច្បាប់សន្តិសុខនេះ មាន «ផលប៉ះពាល់យ៉ាងខ្លាំងក្លាបំផុត ក្នុងនោះរួមទាំងលើបុគ្គលនៅក្នុងប្រទេសអូស្ត្រាលី» ផងដែរ៕