កូរ៉េខាងជើងកំពុងសាងសង់កំពែង និងជីកផ្លូវនៅខាងដែនដីរបស់ខ្លួននៃតំបន់គ្មានយោធា (DMZ) តាមបណ្តោយព្រំដែនជាមួយកូរ៉េខាងត្បូង។ នេះបើតាមសារព័ត៌មាន Yonhap News ដែលបានរាយការណ៍ កាលពីថ្ងៃសុក្រ (ទី១៥ ខែមិថុនា)។

ដោយដកស្រង់ប្រភពពីយោធាមិនបង្ហាញអត្តសញ្ញាណ សារព័ត៌មាន Yonhap បានឲ្យដឹងថា ការសាងសង់ បាន និងកំពុងធ្វើឡើង នាពេលថ្មីៗនេះ នៅផ្នែកខ្លះនៃតំបន់ដែលមានទទឹង ២គីឡូម៉ែត្រ រវាងគែមខាងជើងបំផុតរបស់ DMZ និងខ្សែព្រំដែនយោធា (MDL) ដែលបែងចែកឧបទ្វីបនេះ។

ហេតុផលរបស់កូរ៉េខាងជើង ក្នុងការសាងសង់នេះ នៅតែមិនដឹងច្បាស់លាស់នោះទេ ហើយសារព័ត៌មាន Yonhap ក៏មិនបានប្រាប់នោះដែរថា តើកំពែងនោះមានកម្ពស់ ឬទទឹងប៉ុនណា។ សារព័ត៌មាននេះ បានរាយការណ៍ថា កាលពីដើមខែមិថុនានេះ ទាហានកូរ៉េខាងត្បូងបានបាញ់ព្រមាន បន្ទាប់ពីទាហានកូរ៉េខាងជើងមួយចំនួន ដែលកាន់ចប និងប៉ែល ដើរឆ្លងចូល MDL មួយភ្លែត ដែលប្រហែលជាពាក់ព័ន្ធនឹងការសាងសង់នេះ។

គួរបញ្ជាក់ថា ទំនាក់ទំនងរវាងប្រទេសទាំង២ នៅតែតានតឹងដដែល បន្ទាប់ពីកូរ៉េខាងជើង ថ្មីៗនេះ បានបញ្ចូនបាឡុងដែលផ្ទុកទៅដោយសំរាមចូលទៅប្រទេសកូរ៉េខាងត្បូង ហើយទីក្រុងសេអ៊ូល បានសងសឹក ដោយនិយាយថា ខ្លួននឹងបើកឧបករណ៍បំពងសំឡេងដែលបើកសំឡេងឃោសនាខ្លាំងៗ នៅក្នុងតំបន់។ ប្រទេសកូរ៉េទាំង២ ដាក់ទ័ពរាប់សែននាក់ និងអាវុធជាច្រើន នៅជិតព្រំដែន៕